An katabang, dara hin usa nga kinhat han alperes, binmaton.
— Oo, senyora, linmusad.
Hinbatian nga nahakatawa ngan tinmalo han patlong.
An bana naghinayhinay pagbuhat dida han iya linilingkuran; nagtibukas an purtahan...
Usa nga kuligi, an paghulantog hin usa nga lawas nga nahaarog, mga buyayaw, siyabaw, panampalas, linagapik, mga pagaw nga tingog . . . Hino in makakagtukib han nahinabo didto ha sakob han masirumsirom nga sulod?
An katabang nga linmagos ngadto ha kusina, kinminhat hin may kahulugan han parapanluto.
— Pagbabaydan mo ito! —ginsiring hini.
— Ako? tingali say an bungto! Ginpakianhan la ako kun linmusad, diri kun binmalik liwat.
An parapangalayo pinmakuro han sugbong ngan magpadayon pagrabot han barahibo hin usa nga manok.
May ada mga ikanapulo an uras ha gab-i. An urhi nga mga kuwitis baga nagkakahuhubya na panlatos hin tipaigbaw ngadto han masirom nga langit diin pamamaginggat, sugad hin mga bag-o nga bituon, in mga lubo nga papel nga nanlupad dara han aso ug mapaso nga hangin. An may mga upod nga kalayo nga nabuswak didto ha igbaw nagkasusunog ngan naginkahihirutan han may mga balay, salit damo pa in balay nga may mga tawo nga nanunungtong ha bubong, nga may dara nga haglaba nga kawayan nga may dugnit ha katapusan ngan hin hungot nga puno hin tubig. Dapit nanlalambong la hira dida ha bawbaw han mga bubong tungod han diri kaupay mahayag nga kapawa han gab-i, baga hira in diri mga sugad ha aton nga nannguysad tikang ha igbaw pagkita han pagkalipay han mga tawo. Pinanuritan man liwat in mga nagbibirik, mga kastilyos, mga baka ug mga karabaw nga kalayo ngan hin usa nga bulkan nga asya an linmupig han ngatanan nga katingalahan nga hinkit'an na han mga taga San Diego.
Ito nga uras an tawo nagtitipakadto ha plasa pagkita han paguwa, kay amo na la yana nga gab-i. Dinhi ngan
