murot han latigo ngan magpakiana hin mahinay nga pulong:
— Inaano ka? Waray ka ngani paghatag ha akon hin maupay nga gab-i!
An alperes waray baton, nagtawag han iya katabang.
Dad-a ini nga babayi, — nagsiring; —sidnga hi Marta nga liwanan hin dugnit ngan bulngon iton kasamdan! Ngan ikaw man, pakaunon mo hin maupay ngan tagan mo hin maupay nga higdaan. . . magtagam la an magpasipara ha iya pagraugdaog! Buwas han aga idudulong ito ngadto ha balay ni Sr. Ibarra.
Katima hini sadhan hin maupay an purtahan, binutangan hin patlong, ngan daupon an iya asawa.
— Gintinalinguha mo gud nga akon ka pamiulan !(11) — ginsiring, pinangungumo an kamaoo.
— Inaano ka?— pinmakiana an babayi, tinmindog ngan magtiisol.
— Inaano ako?— sinminggaak, an tingog daw an lilinti, dara in panampalas, ngan ipinakikita niya in usa nga papel nga puno hin mga bagisbagis, ngan magpadayon:
— Diri ka say hini nagsurat ngadto ha Alcalde pagsumbong nga ginbabaydan ako basi ko igtugot an pagsugal, ikaw nga p. . . ka? Ambot kay ano nga diri ta ikaw iginrurumbok!
— Ada, hala, pagpasipara!— nagsiring hin badyangas an babayi; —tarutawo ha imo an magrurumbok ha akon!
Binati han alperes ini nga pakaraot kundi ginkikinita niya an latigo. Pinurot niya in usa nga pinggan dida ha bawbaw han lamisa ngan ilabay ha ulo han iya asawa; an babayi, kay hiara na hini nga mga paagi, inmubo hin tigda salit an pinggan didto patok ha puto; amo man an nahinabo han usa nga tasa ngan hin usa nga sipol.
— Matalaw!— pagpasipara la pagpaharani.
Ngan dayon tuprahi pagdugang pagsudyot. Nagsirom an pangitaan han lalaki ngan kinmuros han iya asawa naglililigsa, kundi an babayi, kay maikmat hin duro, nakadalidali paglapdos ha iya bayhon han latigo ngan dumalagan, nagpapamudol, ngadto ha iya sulod ngan magsada didto hin dagmit. Nagbubuto hin kangalas ug kasina, dinmangkulos an alperes paglanat, kundi say la niya sinangkuan an sada nga say pa nakapadugang han iya pagliligsa.
— Tulin hin mga tampalasan, baboy, paagia ako, p . . .
