An pulong nga binagisan ha ubos ginluwas niya hin darudako nga kahulugan ngan haruhataas nga tingog.
—Hi Sr. D. Crisostomo Ibarra naghuhulat han mga sugo ni V. E.! ―nagpasabot in usa nga ayudante.
Hi Maria Clara inalpan hin kalisang.
—Ah! nagsiring an Capitan General;— tuguti ako, senyorita, nga igkakita ko ikaw liwat ugsa ako lumakat dinhi hini nga bungto; may ada ko pa ighihimangraw ha imo nga kasuruk'an gud. Sr. Alcalde, buot ko unta nga updan ako ni V. E. ha pagkalakat niyan katima ko pakighimangraw hin waray tambong nga iba kan Sr. Ibarra.
—Tuguti kami, V. E., nga magpasabot ha imo,— nagsiring hi P. Salvi hin mapinaubsanon nga tingog, nga hi Sr. Ibarra eskomulgado na...
Tinapo ni S. E. hin pagkasiring.
—Nalilipay ako nga waray ko iba nga sadang ikasakit kun diri an kamutangan la ni P. Damaso nga akon ginhihingyap ha kasingkasing nga mag-upay unta hin waray na paghiburubughat, kay ha iya panuigon an pagsakay tipakadto ha Espanya tungod hin kamaraot hin lawas diri daw ada makairindig. Kundi ini aada la ha iya... an baga hini nga uras, magmaupay na la unta an mga lawas nira VV. RR.!
Naghinpanguli ngatanan.
—Ngan kaiya daw la nga aada la ito ha iya!-nangutob hi P. Salvi.
—Kikitaon ta na kun hino in hauna pagsakay tipakadto nagmugo in usa man liwat nga pransiskano.
—Malakat ako ito ngahaw yana ha Manila, ―nagsiring hi P. Sibyla waray hiayuni.
—Ngan kami mauli man ngadto ha amon lalawigan: sinmunod an mga agustinos. Waray hiayuni an tagsatagsa ha ira nga tungod han sayop hin usa nga pransiskano an pakiatubang ni S. E. baga mahagkot la.
Didto ha may lagusan ira iginkita hi Ibarra, an nanagtawo ha ira may pira pa la kauras. Waray ha ira may nakigkatahod, kundi namaggisiplatay hin suluran hin damo nga kahulugan.
An Alcalde lugod, han panhilakat na han mga prayle, nakigkatahod ngan nakiglamano ha iya hin kahinasa, kundi an pag-abot han ayudante nga say na tuyo an batan'on amo
