mapatay, an maaram ug an diri . . . an maupay na la pagukoy hin waray kasamukan.
Ngan an buutan nga babayi nanhaharoy ngan naniniplat ha langit.
—Ta, ako,— nasiring hin madig-on nga pulong hi Kapitana Maria, —kun ako la in salapian sugad ha imo, palalakton ko iton akon mga anak: kabataan pa ngan kinahanglan nga mga sano nga adlaw managmaupay nga mga tawo... ako diri maiha mamamatay... ha lain ko na nga kinabuhi hira igkikita... an mga anak kinahanglan maghingyap hin labaw pa han naaabot han ira amay, ngan dinhi ha aton butkon waray ta mahatututdo nga lain kun diri an pagbinatabata.
—Agi nga mga panhunahuna iton imo!— nabaraka hi Kapitana Tinay, gintatakop an mga kamot; —sugad hin waray ka pagkuri pag-anak hiton imo karuha!
—Amo man ngani, tungod kay ginkurian ako han paganak ha ira, ginbubuhi ko ngan pinapapag-aram ko, bisan kun kami kablas, diri ko karuyag nga unina, katima hini nga mga pagginuol, diri magkahihimo nga mga tawo...
— Pag-abat ko diri mo hinihigugma iton imo mga anak sugad han sugo sa Dios!—nasiring an larang ni Hermana Rufa.
—Tabi daw; may ada lain nga paghigugma han tagsatagsa nga iroy han iya mga anak; may ada tungod han pagtamod ha iya ngahaw, may ada tungod kay katungdanan, ug may ada man liwat tungod kay kaupayan ngahaw han iya mga anak. Sugad hini an akon paghigugma ha irakay asya an tutdo ha akon han akon bana.
—Ngatanan iton imo panhunahuna, Kapitana Maria,―nagsiring hi Rufa, baga in nagwawali,—diri nahaaangay han Tuluuhan: angay ka umapi ha pakigkaburugto han Smo. Rosario, kun diri man ha S. Francisco, ha Sta. Rita, kun Sta. Clara man!
—Hermana Rufa, kun matakos na ako nga bugto han mga tawo, amo na in pakigkaburugto ko han mga santos! binmaton, nahiyom.
Basi ta tapuson ini nga bahin han hiruhimangaw ngan basi man liwat an mga bumarasa makakita, bisan ha laktod la, kun ano an siring han mga taga huron mahatungod hini nga kasugad, tana kita ngadto ha plasa, ngadto ha sirong han inatpan hin lona, nga amo an ginhihiruhi-
