An mga banda han musika namaglinibot han bungto han pagpamalasibas la, an ira maglipayon nga tuktok nanmukaw(l) han mga guol nga umurukoy han bungto. An aringasa ug kamarugyaw binmalik liwat, an mga lingganay binmalik panhibatii hin pamagrinupiki ngan an binutubuto nagtikang.
Asya adto an katapusan nga adlaw han piyesta kay asya gud na an katungtungan han patron. Ginpapamulat in darudamo nga kiritaon, darudamo han kakulop. An mga Hermanos han V. O. T. darudamo han ha Smo. Rosario, ngan an mga katirig-ob maglipayon kay hilulupigan nira an mga taga luyo. Darudamo nga kandila an ira pinalit; an parapangandila nga kainsikan nanhikaruyag,(2) salit, tungod hini, nakapanhunahuna hira hin papanmunyag(3) bisan la damo an nagdidig-on nga ini nga ira tulos diri tungod hin pagtoo han pagkakatoliko, kundi tungod kay karuyag mangasawa. Kundi ini binabaton han kababayin’an nga magpakidiyos:
—Bisan pa kun sugad, kay iton panhikasal la han kadam an nga insik milagro na ito; makakakabig na man la ito hira hiton ira asawa ngada ha tuluuhan.
An mga tawo nanul-ot han ira gimaupayi nga panapton; nanhigawas didto han mga pirit'an an ngatanan nga alahas. Bisan an mga parasugal ug mga parabulang(4) nanmanapton hin mga binurdahan nga may mga batunis nga dagko nga brilyante, magbug-at nga kayrel nga bulawan ngan hin magbusag nga kalo nga hipihapa. An tigurang la nga pilosopo an asya la gihapon; an sinamay(5) nga bado nga may maitom nga samay, nga pinakot tubtob ha liog, an haluag nga sapatos ngan han halapad nga kalo nga piyeltro nga abuhon na pagkit’on.
—Labi ka kamasamdong yana; — ginlabtan hiya han tenyente mayor; —nadiri ka nga nalilipay kita ha tigdali kay say ta na man la urog in kasakit?
—An pagkalipay diri karuyag sidngon nga pagbuhat hin kabinuangan! — binmaton an tigurang. —Asya ito an waray hangkag nga mga rakya ha ikinatuig! Ngan ngatanan ini tungod kay ano? Pagkinarag hin salapi kun iini duro inin mga kakablasan ug mga kasuruk’an! Maaram na
