macho man, liniwat la ngan dinugangdugangan. Dida han nagpapahimulos kami han mga kinaon nga hinimo hin usa nga parapanluto ha La Campana, an orkesta nagtitinuktok hin mga arangay nga tunog. An gimahuhusayi nga daraga dida han balay may sul-ot nga panapton nga mestisa(11) nga may rayandayan nga uusa kaurapong nga brilyante, ngan hiya gihapon an naghahadi han bug-os nga hiringyon. Ikinasasakit namon ngatanan ha sakob han amon kasingkasing nga in usa nga gutiay nga paghibasuon han iya makawiwili nga tiil say nakapugong ha iya hin pagsayaw, kay kun aton hunahunaon dida han kalasgod niya ha ngatanan la nga bahin, hi gining de los Santos angay gud nga nasayaw sugad hin usa nga silfide.(12)
“An Alcalde ha lalawigan inmabot kanina han kulop, an iya pagtambong diri lain kundi an pagpakamahal han kaadlawan buwas. Ikinasakit niya an kabilinggan nga binabati han pinili nga manggaranon nga Go. Ibarra nga, salamat sa Dios, sugad han sumat ha amon, nag-upay na.
“Yana nga gab-i namay-prosesyon nga dako, kundi hinanabihan ko nala ini ha akon surat buwas, kay labot la han mga binutubuto nga nakagpinakalas ug dapit nakabungol ha akon, guol ako kaupay ngan naghihituyangko na. Ta, dida hinin mapahuway ako ha mga butkon ni Morfeo,(13) karuyag ko sidngon, ha katre didi ha kombento, ginhahangyo ko ha imo, sangkay nga pinili, in maupay nga gab-i ngan mahisangpot unta kita ngada buwas nga asya an dako nga adlaw.
- “Imo mahinalangpon nga sank, nga n. h. k.,
“San Diego, ika-11 han Nobyembre.” Asya ini an surat han buutan nga korresponsal. Kikitaon ta yana kun ano an ginsurat ni Kapitan Martin nga taga Cavite, ngadto han iya sangkay nga hi Luis Chiquito.
“Higugmaon nga Choy: Dagmit ngadi kun mahihimo mo kay maribhong hin duro inin patron; hunahunaa nga hi Kapitan Wakin haros puto na: nakatulo dublahi ni Kapitan Tiyago ngan nakatulo pakaigo ha pag-ukab, salit hi Ginhaupan Manuel, an tagbalay, nagtitidugang kagutiay ha dako nga kalipay. Hi P. Damaso binmuong, ha usa kapagpukpok, hin usa nga kingke kay ngada yana waray pa may gindag’an nga taya; an Consul napirde dida han iya mga manok, ngan dida ha bangka nahabilin ngatanan an iya
