han pagsig-unahay hin pakapadara han bantog nga magwawali, an nakadamo ta na hinabihi nga M. R. P. Fr. Damaso nga say buwas matukdaw ha tungod han Espiritu Santo pamulong hin usa nga wali nga sugad han ginmamatuuran han ngatanan, magiginsanglitanan ha pagtoo ngan pinulungan.
“Sugad han nahiasoy ta na ha igbaw, nahitambong kami hin usa nga kiritaon nga makaaramdok. Uunom nga batan’on nga kapadian, tulo ha ira an nakanta han misa, tulo man an nagsisirbe, ginmawas tikang ha sakristiya ngan magkaluhod ha altar ngan kumanta dayon an selebrante nga amo an M. R. P. Fr. Hernando de la Sibyla han Surge Domine nga asya an igintitikang han prosesyon palibot han sakob han singbahan, hadton makawiwili niya nga tingog ug diniyusnan nga kilos nga kinikilal’an ha iya han kadam'an ug ha iya ipinakakadayaw han ngatanan. Katapos han Surge Domine, an gobernadorsilyo, nakakasul-ot hin prak, nakapot han giyon ngan bunyog ha iya in uupat nga monosilyos nga namamagdara hin insinsaryo, nagtikang an prosesyon. Dida ha ira luyo nasunod an mga salapi nga siryales, an mga punuan han bungto, an magpakaruruyag nga ladawan nira Sto. Domingo, S. Diego ngan Virgen de la Paz nga may makaiindig nga matagom nga kapa nga pinutakan hin haglapad nga lapak nga salapi nga binulawanan, halad han banal nga nag-gobernadorsilyo nga asya an turundugon ug diri kasumhan hin paghinabihi nga D. Santiago de los Santos. Ini ngatanan nga mga ladawan nanhihitungtong hin mga karro nga salapi. Ha luyo han Iroy sa Dios nanhihisunod kami an mga kakatsilaan ug iba pa nga kapadian, an selebrante dida paglalakat ha sirong hin palyo nga gindadara hin mga ginhaupan, ngan say nauurhi an darayawon nga Guardia Civil. Diri ko na sadang ig-asoy nga an kadam’an nga mga indiyo nga nagrurumbay ha magkalyo nga daplin han prosesyon magdiniyuson nanmimitbit hin mga pinaruktan nga kandila. An banda nagtitinuktok hin mga diniyusnon nga martsa; nadudungog in sunudsunod nga buto han mga luthang ug mga pinabirik nga kalayo. Nakakatingala ha pagkita an pagpaubos ug panginyupo nga nadangop ha kasingkasing han mga matinumanon, an pagtoo nga dako ngan uray nga ira ipinakakatakos han Virgen de la Paz, an pinakamahal ug tigsad nga pa-
