ug pinili nga pahayagan ha Manila, nga ikinatatag-ob an iya panyakan ug hataas nga paglaladngan. Aydon na lahan mga bumarasa an talagudti ug kinaiya nga mga sayop nga sumat.
An takos nga korresponsal han hamili nga pahayagan nagsurat sugad hinin masunod:
“Go. nga Magwaraydong. . .
“Pinili ko nga sangkay: Waray ko pa hitambungi ngan diri ko ginlalauman nga hitatambungan, ha mga lalawigan in sugad kadako, kamaribhong ug kamakatarag-ob nga kaadlawan sugad han ginsaurog didi hadi nga bungto han mga MM. RR. ug mga banal nga PP. Franciscanos.
“Damo kaupay an mga dumuruaw: didi ako igkapalad pakigkaangay han haros ngatanan nga kakatsilaan nga nangungukoy dida hini nga lalawigan, hin tulo nga RR. PP. Agustinos ha lalawigan han Batangas, hin duha RR. PP. Dominikos, usa ha ira amo an M. R. P. Fr. Hernando de la Sibyla nga tungod han iya pagtambong nakahatag hin dungog hini nga bungto, usa nga diri angay hingalimtan han mga takos nga bungtuhanon. Hinkit’an ko man liwat in kadam’an nga kapunuanan ha Cavite ug Pampanga, in damo nga mga manggaran ha Manila ngan in diri harumamay nga mga banda hin musika, usa ha ira asya an gibabantugi ha Pagsang'han nga kanan Go. Escribano Don Miguel Guevara, ngan in diri maisip nga kainsikan ug mga indiyos nga, dara han ka-mga-mainusahon han mga insik ug kamagdiniyuson han mga indiyos, nagpapamulat nga gayod ban adlaw nga igsasaurog han marahalon nga patron basi hira makatambong han igpapaguwa nga pataraw’an nga kinantahan, linuwahan, sinayawan ngan makaaramdok nga paguwa nga say igintindog han dako ug haluag nga paguruwaan dida ha plasa.
“Ha mga ikasiyam an takna han gab-i han adlaw nga ikanapulo, nga asya an kaburuwasan han patron, katapos han pahura nga panihapon nga iginhatag han Hermano Mayor, say nakaaghat hin pamati han ngatanan ha amon nga kakatsilaan ug mga prayles nga nakadto ha kombento, an tunog hin duha nga banda hin musika nga binubunyugan hin kadam-an nga mga tawo, tunog nga nahasasabat han aringasa han mga kuwitis ug mga luthang, ngan ginuunhan han mga punuan han bungto tipakada ha kombento pagkuha ngan pagdulong ha amon ngadto han daan andam
