kapadian la an iya tinatapuran, nga natitindog la tungod kay pinasasarig nira, nga nabubuhi tungod kay tinutugutan nira nga mabuhi ug ha adlaw nga ira bayaan matutumba sugad hin usa nga maniki nga nakuhaan hin tukod. An Gobyerno gintatarhog nga maalsa an bungto, ngan an bungto gintatarhog han gahom han Gobyerno; dida hini kikitaa in usa nga masayunay la nga uyag nga masugadsugad hiton nahananabo han mga hadlukon nga nanhihingadto ha mga kasisidman: bisan an ira la ngahaw lambong pinakakasiring nga manunulay, ngan pinakakasiring nga tingog nga lain an aningal han ira la ngahaw tingog. Diri pa ngani asay han Gobyerno igkasabot an bungto diri malulukba dida hito nga kauripon; madadayon hin paghitanding hiton mga bata nga nagkakahahadlok han tingog han magmarangno ha ira ngan nagpapakiluoy pa ha iya nga igkaupay. An Gobyerno diri naghihingyap hin madig-on nga kabubwason kay usa la nga butkon, an ulo amo an kombento, ngan dida hini nga sulog nga iya hin-aanuran tikang didto hin usa nga kahiladman ngadto hin haruhalarom pa, nagiginlambong na la, nawawad'an han kalugaringon nga ngaran ug dungog ngan dida hini nga iya kamaluya ug kawaray kagamhanan itinatapod niya na la an ngatanan ha maghikaw nga mga kamot. Isari pagtanding inin Gobyerno dinhi han didto han mga tuna nga imo hingadtuan
— Ah! —nagmugo hi Ibarra, dako na ito nga pinangangaro; iluba ta na la anay nga an bungto diri nagluluya, nga diri nagmamasakit sugad han mga bungto ha mga lain nga tuna, ngan ini salamat han Tuluuhan ug han kamaluluy'on han mga punuan.
— An bungto diri nagluluya tungod kay waray tingog, diri nagkikiwa tungod kay nahararaptay, ngan nasiring ka nga diri nag-aantos hin kasakit, ini tungod kay diri mo hinkikit'an nga nagdudugo iton iya kasingkasing. Kundi mga sano hikikit'an ngan hibabatian mo ngan kairo! hadton nasarig han ira kakusog dida han kawaray sarabutan ug kamatinuuhon han bungto, kairo! han nanhihikalipay dida han panlimbong ngan nagbuburuhaton ha kasisidman han gab-i ngan nakakasiring nga ngatanan nangangaturog! Unina kun silawan na han adlaw adton namul-at ha kasisidman, aabaton ta an makaharadlok nga pagsupil han dugo; an ngatanan nga kusog nga napugngan ha sakob hin pira kagatos katuig, an damo nga hilo nga natirok ha tinag-usa
