han mga turumanon asya an nakakatalwas han kadam'an nga kamatuuran dida han tulos han mga man-guruba nga kapadian.
— Ano man nga yinaknan iton imo isinusurat? —nagpakiana hi Ibarra katima hin usa kadali nga diri pagtingol.
— An aton yinaknan, an tinag-alog.
— Kay nahagagamit ngayan an heroglipiko?
— Kun diri la tungod han kamakuri nga buruhaton kay nagkikinahanglan hin mairuiha nga uras ngan hin dako nga pag-alagyam, haros makakasiring ako nga mauruupay gami'ton han linatin nga abisihan. An mga ehipsiyo may ada han aton mga tiringgan; an aton o nga ha katapusan la gagamita ngan diri sugad luwason han kinatsila kundi tungatunga ngan waray nira totoo nga tingog hin o ngan u: sugad ha aton an mga ehipsiyo diri man nagamit han tunog nga e; may ada nira han aton ha ngan han aton kha nga waray ha linatin nga kasurat, nga aton ginagamit ha kinatsila. Pananglit: ini nga pulong: mukha, —sinmiring tinmudlok didto han basahan, —mauruupay ko suraton an latin nga ha hinin dagway hin isda, diri lugod ako han h nga linatin nga ha Europa magkalainlain an kaluwas. Kun kinahanglan in diri makusog kaupay nga paghinggok, pananglit dida han pulong nga hain, nga an h maluruluya, say ko ginagamit in lawas hin liyon, kun di man, inin tutulo nga bukad hin loto, sugad han kadamo han tiringgan nga dara... Labot pa, may ada ko tunog nga nguhok, nga waray gihapon dida han abisihan nga linatin nga ginagamit ha kinatsila. Nasiring ako nga kun diri la tungod hinin kakuri nga buruhaton tungod kay an panhimo han magkalainlain nga dagway kinahanglan uupayon, haros makakasiring ako nga an heroglipiko asya in angay naton gamiton nga kasurat; kundi ini ngahaw nga kamakuri asya an nakakaaghat ha akon hin pagtalinguha nga mahalipot la nga asoy, nga say la habutang an kinahanglan gud; labot pa, ini nga buruhaton nakakaliaw ha akon, kun an akon mga tumurungbalay nga tikang ha China ngan Japon nagpapanguli na.
— Hain?
— Diri ka hadi nabati? An akon mga tumurungbalay asya an mga sayaw; hini nga tuig kulang hin usa; tingali gindakop hin usa nga bata nga insik o hapon ba.
— Kay ano in pagsabot mo nga tikang hira didto hito nga mga tuna?
