unob ginpapanunod, ngan kinahanglan nga sugad hini an mahinabo kay diri ka maruruyag, sugad man ako diri, hin pamati han aton mga anak nga magbabasol unina han aton pagkaasawa nga say ta la ha ira iginbilin in mga kasakitan. Maupay na la nga mapasingadto ka han imo mga urupod, kalimuti na la ako, kalimuti an binuang ug waray kapulsanan nga higugma! Man gad pa didto igkita ka hin diri sugad ha akon.
— Elias! nagsaway an daraga.
— Diri ka sayod han karuyag ko sidngon: ginhihimangrawan ta ikaw sugad han paghimangraw ko han akon bugto kun daw buhi pa yana, dida hinin akon mga pulong waray ko suson ha imo, waray tinago nga panhunahuna. Kay ano nga pagbibiduon ta ikaw hin usa nga suson? Tuod la ha akon, pasingadto ha balay han imo kaurupdan, hingalimti ako, kay kun hingalimtan mo ako diri na ako mauuraura hin kawaray palad. Dinhi waray mo gud sadang sarigan kundi ako la, ha adlaw nga mahulog ako ha mga kamot hiton namamagbiniling ha akon mag-uusaan ka na la, pag-usaan ha bug-os mo nga kinabuhi kun hibaruan nga naginsangkay ka ni Elias. Pagpahimulusi an imo pagkabata ngan han imo pagkamahusay ha pagbiling hin asawa nga angay ha imo; diri, diri ka pa maaram kun tipaunano an pag-ukoy hin uusa la, uusa la ha butnga han katawuhan.
— Gin-inisip ko nga imo ako uupdan...
— Hay! binmaton hi Elias nagpilingpiling han ulo; — makuri, labi na yana ngagayod! Waray ko pa igkita an akon kinanhi pagbiling, waray kahimuan! Yana nga adlaw nautang ko an akon kagawasan!
Ngan igin-asoy ni Elias hin laktod an nahanabo hadto nga aga.
— Waray ako pangaro ha iya nga panabagan ako, diri ko iginpapasalamat an nabuhat kundi an pagbati nga nag-aghat ha iya ngan kinahanglan ko ini pagbalsan. Ha luyo nga bahin, ha Mindoro ngan ha iba nga daplin mabutho manta an nag-agi ngan hibabaruan.
— Ta, kun asya man, — Nagsiring hi Salome nga mahigugmaon nagkikinita ha iya; — kun lumakat na ako, dinhi ka pag-ukoy, dinhi hini nga payag. Makakaagda ini ha imo hin pagdumdom ha akon ngan ako, tikang didto ha hirayo, diri makakahunahuna nga ilinupad han bagyo o gin-guba man han mga balod. Kun magdumdom ako hini nga mga
