— Malakat na ako, Salome! Matutunod na an adlaw ngan sugad han imo panhunahuna, diri maupay nga an mga kaamyaw makasiring nga nagab-ihan ako dinhi... Kundi, nagtuok ka! nagsiring binalhin an tingog ngan nagkukuriot; ayaw igdiwara hiton imo hiyom, nagtuok ka!
— Ta, oo! binmaton an daraga nga nahiyom hamtang an iya mga mata napupuno hin bag-o nga mga luha:-kay ako masubo man liwat.
— Kay ano nga masubo ka, minaupay ko nga sangkay?
— Kay diri maiha malakat ako dida hini nga balay nga akon natawuhan ug gintubuan, — binmaton hi Salome nga namahid han mga luha.
— Kay ano?
— Kay diri maupay nga mag-inusaan la ako pag-ukoy! Makadto ako paglungon hiton akon kaurupdan ha Mindoro... diri maiha makakabayad na ako han utang nga bilin ni nanay han kamatay, an patron han bungto maabot ngan an akon mga ugang ug mga pabo magtambok hin maupay. An pagbaya hin usa nga balay nga asay natawuhan ngan natubuan labaw hin pagtalikod han katunga han lugaringon nga pagkatawo . . . An mga bukad, an tanaman, an akon mga sarapati! Kun bumagyo o bumaha ngatanan iaanod ngadto ha dagat!
Hi Elias nahapaukoy, nagpinanhunahuna, katapos kaptan an kamot han daraga ngan tutukon ha mata pinakianhan:
— May hinbatian mo ba nga nagyinakan patok ha imo? Waray? Ginsamok ta na ba ikaw bisan la makausa? Waray liwat? Kun sugad sinusumhan ka na ha akon ngan basila makalikay ka ha akon...
— Diri, ayaw pagyakan hin sugad hito! Kun mahihimo la unta nga sumhan ako ha imo! — binmaton an babayi.
— Jesus, Maria! Ha adlaw ug gab-i waray ko iba nga buhat kundi pagdinumdom hiton pagkakulop nga imo ikinakanhi! Han waray ta pa ikaw igkakakilala, han buhi pa an akon makaluluoy nga iroy, an aga ngan han gab-i para ha akon amo an gimauupayi nga binuhat sa Dios: an aga tungod kay hinkikit 'an ko an pagsirang han adlaw, an panganinaw han iya mga silaw dida ha kadagatan nga kinakaturugan hin dayon han akon amay kay hinkikit'an ko an akon mga bukad, nga nanlulunghaw an mga dahon nga nalaya han kakulop nga adlaw; an akon mga sarapati ug kamanukan nga dagos tatapo ha akon sugad hin karuyag maghatag ha
