sudlay nga kara nga say nakipit han iya yano la nga pungos, ngan hin usa nga kuwintas nga itom nga nahasasab-ong ha iya liog ha bawbaw han bado.
Angayan an iya tindog tungod kay batan'on, tungod kay mahusay an iya mga mata, gutiay an irong, haligot an baba, may pagkaarangay han iya pagdara han iya lawas ngan han iya matam'is nga pamayhon nga amo an nakakahatag hin pawa; kundi diri hiya maanyag nga nakakapukaw pagkita ha siyahan nga siplat, sugad hiton mga gudti nga bukad ha patag nga waray tina ug waray hamot, nga aton la gintatamakan hin diri tinuyo, ngan dida na naton sasabuta an ira kahusay kun aton na tinututok hin maupay, mga bukad nga diri kinikilala nga may gutiay nga alimyon.
Ha ikinatigdali nasiplat ngadto han danaw nga uraura kamabalod, nahunong han iya buhat ngan namamati, kundi waray niya inaabat nga bisan ano, nabalik liwat ngadto han iya buhat lakip in mahilom nga panhayhay.
Kundi an iya nawong naglambrag han pakabati hin mga tunob: ibinutang an iya tinahi, binmuhat, pinangunat an mga kapiluan han iya panapton ngan, mahiyumhiyom hinmulat ha dapit han gutiay nga hagdan nga kawayan.
An mga sarapati nagkalupad, an mga pato ngan kamanukan namaghuni ngan namagkakak ngan an masurub'on nga paraulin inmulpot nagkakagaramo hin sungo ngan hin uusa kabulig nga saging nga iya ibinutang ha tuna hin waray aringasa, hamtang naduhol han batan'on nga babayi hin usa nga turungaw nga buhi pa ngan nagpipilipiki.
An babayi nagkinita han batan'on hin lisang nga paniplat, katapos ibinutang an isda didto hin panay nga tubigan ngan balikon an iya tinahi linmingkod dida ha sapit han paraulin nga, waray la pagyayakan.
— Gasi ko adto didi ka pag-agi ha dagat, Elias; nagsiring bahin ha pagtikang hin himangraw.
— Waray ko kahimo, Salome; — binmaton hi Elias hin hamubo nga tingog; — inmabot an lantsa nga nagsisinudoy hiton kadagatan ngan may uusa ko dida nga kilala.
— Ginoo, ginoo! nagsiring an babayi nga nababaraka, nagkikinita kan Elias.
Naiha anay ugsa may magtingol: an paraulin nagkinita hin waray aringasa han maglubay nga bugway han mga tangnan nga namamag-abug-abog, iginpapaypay an ira mga tais nga dahon.
— Nalipay kamo hin duro? — nagpakiana hi Salome.
