Ngan bumuhat, tinagan an iya kaaway hin tunga hintunga hin uras.
Hi Iday amo an nakakadara han pabirikan nga karton nga nasusuratan han kakap’atan kagwalo nga mga pakiana, hi Albino an nakakakapot han basahan nga may mga baton.
— Buwa! Diri ito matuod, buwa! — nagpipinamaribad hi Sinang, iginpapanluha.
— Inaano ka? — ginpakianhan ni Maria Clara.
— Harumamay mo; nagpakiana ako: “Sano ako bubut’i?’’, akon tinadpan han mga bato ngan ito nga waray hinayon pagpadi binmasa: “Niyan kun tudkan hin buhok an pakla!”(1)
Ngan tiningyayan ni Sinang an nag-iipagparadi nga duro an pagtinawa.
— Hino in nagsugo ha imo hin pagpakiana hin sugad? — sinusnan hiya 'han iya patod, hi Victoria. — Bisan la iton pagpakiana hin sugad hito kaangayan na hin sugad nga baton!
— Ikaw na man in pakiana! — siniring hi Ibarra, idinuhol ha iya an basahan. —Ginkauruyunan namon nga an makakarawat hin maupay nga baton susuhulan han kadam’an. Nanmakiana na kami ngatanan.
— Hino man an nakakuha hin maupay nga baton?
— Hi Maria Clara, hi Maria Clara! — ginmuliat hi Sinang. — Pinapakiana namon hini, maruyag ka diri: “Unob ba an iya paghigugma?” ngan an baton han basahan...
Kundi waray pakatapos kay hi Maria Clara, nagpapamulapula, dinmuok ngan takpuon an baba han nagbabasa.
— Kun sugad, ikadi iton birikan! — nagsiring hi Ibarra, naghihipahiyom. — Mapakiana ako: “Maupay ba in aabutan hinin akon gintatalinguha?”
— Kawaray pulos hin pakiana! — nagmugo hi Sinang. Tinadpan ni Ibarra han bato ngan dida han numero nga ginmuwa pinamiling niya an paypay ngan han rumbay han baton:
— “An mga inop, inop la !”(8) — binasa ni Albino. Hinukad ni Ibarra an telegrama ngan buklaron; nakurog an iya kamot, iya ginbasa.
— Yana nagbuwa ngahaw ito nga imo basahan! — nagyakan, puno hin kalipay. — Basaha!
