nga hin-aaraan didto hadto nga lalawigan, ngan asya an nahaaangay hadto nga uras.
— Kantaha, Victoria, an karantabon mabatungod ban pagkasal! — nangaro an mga iroy.
An kalalakin’an waray uyon, ngan hi Victoria, nga maupay an tingog, namaribad nga hiya pagaw. An ambahanon nga ginngangaranan An Awit ha Pagkasal asya in usa nga ambahanon nga tinag-alog nga nag-aasoy han kasakit ug mga kakurian han pag-asawa, kundi diri nahananabi han iya mga kalipay.
— Magsamdong ngatanan an akon mga karantahon.
— Bisan la, bisan la! — naghinsiring an ngatanan.Waray na papag-inagda; kinmapot han harpa, nagpasakalye anay ngan magkanta hin malanoy, makaruruyag ngan puno hin kaaghop nga tingog:
Diin sahid sangkay lunlon kinikita,
Bis an kamatayon baga malipay la,
Matahom ngan langbo adton paghigugma.
— May ada mo tuna?
— Hingan ak nagkanta.
Ayaw pakiana.
May tuna ko, manta.
May harok nga andam ha im-im nahumla
Kun kinukugos na, pagmata han bata'
Nahangkop ha dughan, kan nanay ungara,
An mga paniplat daw matawatawa.
— May ada mo nanay?
— Hingan ak natangis,
Ayaw pakiana
May nanay ko, sanglit;
Matam-is mapukan ha Iroy nga Tuna
Diin sahid sangkay lunlon kinikita;
Lunlon la kasakit, kamatayon manta
Hadton waray iroy, tuna ngan higugma!Inmukoy an tingog’ nahuman an kanta, hinmunong an harpa, kundi namamati la gihapon an mga mamarati: waray may pinmakpak. An kadaragan’an inmabat nga iginpapanluha an ira mga mata, hi Ibarra baga sugad hin waray hiaayuni, ngan an batan'on nga mag-urulin ngadto ha hirayo an paniplat waray pagkikiwa.
