Nahangalimot hiya han ngatanan, binmalik hiya ngan say niya ginsulsog an dalan nga ginlalaktan hadto nga duduha: amo an dalan nga tadong ngadto han iya mga tuna.
Kawang la an paghinulat ni Simoun nga bumalik hi Ginhaupan Tales hadto nga gab-i. Han pagkabuwas han aga han pagbuhat ni Simoun, kinita niya nga an takob han iya rebolber waray na sulod; iya inukab ngan nakadto ha sakob in papel nga nakakaputos han relikaryo nga bulawan nga may mga esmeralda ug mga brilyante, ngan hin pipira karumbay nga surat nga tinag-alog nga nasi ring: “Pasaylua ako, senyor, nga hamtang aada ka ha akon balay kuhaan ta ikaw han imo kalugaringon; kundi napirit ako han pagkinahanglan, ngan balyo han imo ribolber aada an relikaryo nga imo naruruyagan. Karuyag ko in armas kay ngadto ako pagtampo han mga tulisan.
“Tugon ko ha imo nga diri ka magpadayon han imo lakat kay kun mahangadi ka ha amon mga kamot, tungod kay diri ko na ikaw sumasaka, amon ka aaruan hin dako kaupay nga lukat.
- “Telesforo Juan de Dios.”
—Ha katapusan hinsakban ko gihapon!— nagyakan ngan ginminhawa hin halawig hi Simoun. —Baga damo in kahihirutan... kundi, labi nga naupay; hababaro pagtuman han iya mga saad!
Ngan nagsugo han iya mga suruguon nga magpakadto ha Los Banos ha danaw an pag-agi, dad’on an dako nga maleta ngan maghulat didto ha iya, kay hiya ha sagka pag-aagi dara niya an maleta nga amo an sinusudlan han bantugan nga mga bato. An pag-abot hin upat nga Guardia Civil nakalinay na ngahaw ha iya. Nagpakada pagdakop kan Gihaupan Tales ngan kay waray man igkita say gindara hi Tandang Selo.
Tulo katawo in pinatay hadto nga gab-i. An prayle nga mag-uruma ug an bag-o nga saop dida han mga tuna ni Ginhaupan Tales, nga pinanhiabatan nga patay, mga buong an ulo ngan puno hin tuna an mga baba, didto han pag-ultan hadto nga mga tuna; didto ha bungto, an asawa han saop nga pinatay naagahan man liwat nga patay, sugad man puno hin tuna an baba ngan utod an liog, may papel dida ha harani diin naba-
