NGA HINUMDUMAN HADTON KAPADIAN:
D. Mariano Gomez, nga may kawaluan kaglima an panuigon.
D. Jose Burgos, nga may katluan an panuigon, ngan
D. Jacinto Zamora, nga may katluan kagtulo an panuigon, nga pinanhikog didto ha patibulo ha Bagumbayan hadton ikakaruhaan kaglima nga adlaw han Pebrero, tuig 1872.
An tuluuhan, han pagdumiri hin pagpahaubos ha iyo, nakakapagruhaduha han sala nga iginbutangbutang ha iyo; an Pamunuan, han paglibuti han iyo kasugad hin mga surupaton ug mga kasisidman, nakakapagtahap hin mga sayop nga nabuhat ha mga dalikyat nga kataragman, ngan an Pilipinas, han pagsaurog han iyo ngaran ngan pagngarani ha iyo hin mga ginsakit, diri gud nagmamatuod han iyo kasal’anan.
Salit, hamtang diri mahipahayag hin tukib an iyo kamay-labot han karibok ha Cavite, magmainugupon kamo, madiri, han Tuna nga Natawhan; magmabination kamo, o diri, han pagkamatadong sugad man han katalwasan, may katadungan ko hin pagpahanungod ha iyo hinin akon buhat, ha iyo nga nanhiunong hinin karat’an nga akon gintatalinguha nga makuha. Ngan hamtang naghuhulat kami nga mga sano nga adlaw ibabalik ha iyo han España an iyo mag-upay nga ngaran ngan manginginlabot han pagpataya ha iyo, ini nga mga paypay magin-urhi unta nga halad nga mga uga nga dahon ha bawbaw han iyo hinngangalimtan na nga lubnganan, ngan an bisan hino nga magpasipara pagtamsak han iyo ngaran hin waray dayag nga karig-unan, madum-itan unta an ira kamot han iyo dugo.
