karaha. May ada gud karigudigo an balay kay napaabot ha kalsada an huyop bin hangin nga may sakot nga alisngaw nga marasa, amyon hin mga linuto nga sud-an ug karan’on.
Didto ha entresuelo hinkit’an ni Basilio hi Sinang? habubuay la gihapon sugad han siyahan nga paghikilal’i hinin aton mga bumarasa, bisan kun baga dinmarudakmulay an kalawas nga dinmugang kamalison tikang hiasaw’an. Ngan ha dako niya nga paghitingala, hinsiplatan niya didto ha sag-od, iginkakahimangraw kan Kapitan Basilio, han padi ngan han alperes han Guwardiya Sibil, diri lain kundi hi Simoun, an alahero nga nasalaming ha mata hin tagumon, ngan han iya pamahungpahong nga huyayag.
—Sugara ta na la, senyor Simoun,—nasiring hi Kapitan Basilio;—mapakathon kami ha Tiani pagkita hiton imo mga alahas.
—Ako tikaradto man unta,—nasiring an alperes,— kay nagkikinahanglan ako hin kadena hin relos, kundi damo inin akon mga buruhaton... Kun baga makikigalayon la hi Kapitan Basilio...
Hi Kapitan Basilio nakikialayon hin maupay nga buot ngan tungod kay karuyag niya ighiupay han militar basi diri an iya mga magburuhat pagsamukon, diri hiya nakarawat han kuwarta nga iginpipirit han alperes pagsulod ha iya bursa.
—Imo ha akon pinaskuhan.
—Diri ako matugot, Kapitan, diri ako matugot!
—Ta, ta! Unina na la kita magtutuhay katima,— nasiring hi Kapitan Basilio hin pinaangayan nga kilos. Pati an padi karuyag hin usa kapadis nga ariyos Irin usa nga ginang, ngan nagtugon kan Kapitan Basilio nga ipalit.
—Karuyag ko iton maupay, magtutuhay na la kita unina?
—Ayaw kabaraka, Padre Kura,—an pulong han buutan nga pagkatawo nga karuyag man liwat ighiupay han mga taga singbahan.
Usa kapulong han padi makakaperuhisyo ha iya lakip in pakagasto hin duha pa hadto kapilo: adto nga ariyos amo an pinirit nga regalo. Hi Simoun nagpapahimulos pagdinayaw han iya mga alahas.
—Makalilisang ini nga tawo!—an hunahuna han
