sugad han kamanampan nga mga buhi. Hiya, hi Sinong, an gindabal, nahanunumdom han iya duduha nga magpakaruruyag nga kabayo, nga basi diri tapunan han sakit iya ginpabinditahan, kay amo an sagdon han padi, ngan nagastuhan hiya hin napulo kapisos: waray masugad hini nga sumpa han sakit nga hin-agian han gobyerno ngan han kapadian, lugaring an iya duduha nga kabayo nagkamamatay gihapon. Kundi, bisan la, nalilipay hiya kay tikang han pagbinditahi, tungod han mga pulong nga linatin han padi ngan han mga ceremonias, an duha nga kabayo namagpaanuano, nagpakadagko in bali ngan diri na naruruyag isangat, ngan hiya, bahin ha pagkamaupay nga binunyagan, diri na nagpapasipara paglamba kay ginsiring hiya hin usa nga Hermano Tercero nga binditado na.
Say natatapusan han prosesyon an Virgen, nga may sul-ot pagka-Divina Pastora, may kalo nga frondeuse nga halapad an sabong nga barahibo, basi sabuton an pagkalakat ngadto ha Jerusalem. Ngan basi sabuton an pagkatawo han bata, an padi nagsugo nga pabutulon hin gutiay an tiyan, salit ginbutangan hin mga dugnit ngan hin gapas didto ha sakob han saya basi waray magruhaduha han iya kamutangan. Asya in usa nga ladawan nga matahom kaupay, masamdong gihapon an pamayhon sugad han ngatanan nga mga ladawan nga hinimo han mga pilipino, ngan baga nahakakaalo han pagsugara han iya hitsura han padi. Nag-uuna ha iya in pipira nga kantudis ngan ha iya luyo may mga musiko ngan han kasuruk’an nga mga sibil. An padi, kaiya na gihapon, tungod han iya binuhat, waray umupod; hadto nga tuig dako kaupay an iya nabibiduan tungod kay iya ginamit an ngatanan, basi la an mga tawo magbayad hin katluan kapisos han Misa de Aguinaldo, diri na an kabatasanan nga karuhaan kapisos.
—Nagtitikapilibustero kamo,—iya ginsiring.
Dako gud ada an kagupnganan nga dinmangop han kotsero tungod han iya pinanhikit’an dida han proses yon, kay han paglabay na ngatanan ngan pagsidnga ni Basilio nga magpadayon na hira, waray panginano nga an iya parol napadngan han suga. Hi Basilio, amo gi hapon, waray pakakita kay libang hin pagkinulaw han kabalayan nga namamagparawa ha sakob ngan ha gawas, him mga parol nga papel nga mga urusahon an kahimo ngan magkadilain an mga tina, ngan hin mga
