sumirang ngan diri umulpot an kabubwason ngan magdaog an kalipungan. Kaduwas umuli hi iya tatay, hi Basilio umulpot; kaduwas hiya makaagi hin supot nga puno hin onsita nga bulawan didto ha sakob han alad ha luyo han balay, padara nga supot han mga tulisan; an padi, hi P. Camorra, nga kanunay ha iya nagiintrimis, kaduwas umulpot upod an mga tulisan... An iya mga panhunahuna nagtitikamasamok ngan waray hangkag tubtob nga pinulay hiya han kagul’anan ug kasakitan, nahangaturog hiya ngan nag-ininop han iya pagkabata didto ha sag-od han kagurangan: nakarigos hiya didto han kasulgan tampo han iya kabugtuan; may kaisdaan nga magkalainlain an tina nga napapapanakop la baga in mga lurong, ngan hiya nauurit kay nadiri hiya pagpinanakop hin mga lurong nga isda; hi Basilio nakadto ha salad han tubig, kundi, hin waray hiya sasabot kun ano, an kahimo kan Tano nga iya bugto. An iya bag-o nga agaron nagkikinita ha ira didto ha pangpang.
Umabot hi Basilio ha San Diego naglalakat gud ha kalsada an prosesyon han Notsebuwena. Nalangan hiya ha dalan hin halawig nga uras kay an kotsero, nga nahangalimot han iya sidula, gindakop han Guardia Civil, gin-uy-og, gin-kulata1 ngan katapos gindara ngadto ha kuwartel ha atubangan han Komandante.
Yana an kalesa nahapaukoy liwat pagpaagi han prosesyon, ngan an kotsero nga gindabal natukas han kalo ha dako nga pagtahod, ngan nangangadi hin usa nga Amay Namon ha tungod han siyahan nga ladawan, nga inandas, nga linmabay, nga baga kandn usa nga dako nga baraan. Nanlalawas ini hin usa nga tigurang nga may halaba kaupay nga barangas, nga nalingkod ha ligid hin usa nga kutkot, ha sirong hin usa nga kahoy nga tugob hin nanhahapon nga kadam’an nga tamsi nga inuga nga magkalainlain; may kalan nga may sinun-ad nga daba, may almires nga bayuan hin mam’on, amo la nga kasangkapan, dapit pagpakita nga an tigurang naghuhupot han kinabuhi ha tangpi han lubnganan, ngan dida ngahaw pagtutuon. Amo adto an Matusalem dida han kadidiyusan ha Pilipinas; an iya igkasisugad, ngan
