Amo ini an nakalisang hadto nga duduha katawo nga magkasi magluya, magkasi waray sadang mahimo. Hi Tandang Selo nabuhat, nalingkod, nalusad ha hagdan, nasaka; di maaram kun hino an kakadtuon pagdangop. Hi Juli nadangop han iya mga ladawan, nagiihap, nabalik pag-ihap han salapi, ngan an duduha kagatos kapisos waray pagdadamo, waray kadudugangi; waray kaiha magliwan, gintirok an iya mga alahas, nangaro hin sagdon han apoy, napakadto ha gobernadorsilyo, ngadto ha hukom, ha eskribyente, ha tenyente han Guardia Civil. An tigurang puro la oo ha ngatanan, ngan kun an daraga nasiring nga diri, nasiring liwat nga diri. Waray kaiha magkaabot in mga kaamyaw, kaurupdan ngan kasangkayan, mga kablasanon, mga ubos ngan mga kagaon ngatanan. An labi kamapiskay ha ira amo hi Hermana Bali, usa nga pangginggera nga dako, nga nahangadto ha Manila pagsulod hin ehersisyo didto ha Beaterio han Kompaniya.
Hi Juli magbabaligya han iya mga alahas, gawas la an relikaryo nga may mga brilyante ngan esmeralda nga regalo ha iya ni Basilio. Adto nga relikaryo may ada gin-agian; hatag adto hin usa nga mongha, an anak ni Kapitan Tiyago, ha usa nga sanlahon, ngan iginregalo liwat kan Basilio tungod han panabag hini hadto nga tawo ha pagtambal han iya sakit. Diri mahihimo adto igbaligya niya hin diri anay hi Basilio igkahimangraw.
Ngan nanhibaligya hin dagmit an mga sudlayay, an mga ariyos ngan han kuwintas ni Juli ha usa nga kaamyaw nga salapian, ngan nakaayaw hin kalim’an kapisos; kulang pa hin duduha kagatos kalim’an. Igpeprenda an relikaryo kundi hi Juli napiling la han ulo. Usa nga kaamyaw nagyakan nga igbaligya an balay; hi Tandang Selo inmuyon kay naayon hin pagbalik pagukoy ha kagurangan pamulod hin kahoy nga isurungo sugad han una nga mga panahon, kundi hi Hermana Bali nagmugo nga diri adto mahihimo kay an tag-iya waray dida.
—An asawa han hukom nagbaligya ha akon hin tapis nakausa, hin kanan pisos nga palit, kundi an bana nagsiring nga adto nga pagbaligya waray bali kay diri iya tugot. Aba! binawi ha akon an tapis kundi ngada yana waray pa ha akon iuli an pisos; kundi diri ko binabaydan ha panggingge kun nagdadaog, aba! Salit nakasukot ako hin napulo kagduha nga guti, ngan tung6d
