han mga manggaran ug mga hadianon paggipahataghatag.
Binuksan ni Simoun ngan kinita, dida han hanig
nga raso nga pula, in usa nga surugaan nga urusahon
an dagway. An susuluran hitsura hin granada nga
masugad kadako han ulo hin tawo, dapit bara, ngan dida
hini kikitaa an mga liso didto ha sakob, daw dagko nga
lugas hin mais. An panit bulawan nga tauyon nga nahasubad
gud kaupay pati an mga kakunutan han bunga.
Pinurot ni Simoun hin hinayhinay ngan kuhaon an pabilo, kinita an sag-od han susuluran: asero gud nga may duha kasentimetro an dakmol ngan masusudlan hin kapin usa kalitro. Hi Basilio nagpipinakiana ha paniplat, kay waray gud pakakasabot.
Waray hataghatag hin mga kasayuran, hi Simoun, ha dako nga paghiiot, kinmuha didto hin usa nga sangatan hin usa nga prasko ngan ipakita han batan’on an sinurat dida ha bawbaw.
—Nitro-gliserina!— nakasiring hi Basilio nga inmisol ngan ilmikay an mga kamot. —Nitro-gliserina! Dinamita!
Ngan han pakasantop na ipinanmarat an mga barahibo.
—Oo, nitro-gliserina!— nagyakan hin mahinay hi Simoun, lakip in mahagkot nga hiyom ngan nahakakaruyag pagkinita han prasko nga salaming; —labaw pa hin nitro-gliserina! Kay mga luha ini nga gintiti, mga kasina nga ginpatil-og, mga panalumpigos ngan mga kasiribton. Amo ini an labaw nga katadungan han maluya, kusog nga ato han kusog, paglupig nga ato han paglupig.... Ngada yana nagruruhaduha ako, kundi inmabot ka ngan nagmatuod ako! Yana nga gab-i ilulupad, kunutkunot, an mga magbuutbuot nga duro nga kataragman, an mga magbuutbuot nga waray gintatagad, an napasalipod dida ha luyo han Dios ngan dida ha luyo han Estado, an ira mga pagpahusa diri nasisirutan tungod kay waray nakakahimo pagsumbong! Yana nga gab-i babation han Pilipinas an pagbuto ngan magkakatipiktipik ito nga waray dagway nga monumento nga aikon gintalinguha nga madunot layon!
Hi Basilio nahapapahungat: an iya mga im-im namamagkiniwa kundi waray nagawas nga tingog, naabat hiya nga an iya dila waray pagkikiwa, nagmamara an iya but-ol. Pakakakita pa la niya hadto nga makagaga-
