Inmabót gihapon an kaadlawan.
Hi Simoun, tikang han kaaga, waráy lumakát didá ha iya baláy kay nalibáng han pagpinanipíg han iya mga armas ug mga alahas. An iya makarimadima nga manggad nakadto na nahasusulód han iya dako nga maleta nga puthaw nga may punda nga lana. Nanhihisalín pa in pipirá nga estutse nga may sulód nga mga panglay, mga pakót, tingali ipanririgaló nga waray panhiduhól. Magikán na gad man gud upód han Kapitan Heneral nga diri na gud buót magpahalaba han panahón han iya katungdanan, nahadlok han bisan la ano nga yaknon han mga tawo. An magraot in hunahuna nasiring nga hi Simoun diri nagpapasipara pagpabilin hin hiyá la kay mawaray na ngani dinhi sarigan, diri makakagtagya han mga pagdumót han kadam'an nga iya pinamaglupugan, nga waray mga palad, labí na kay an Heneral nga tiarabot sinisiring nga usa nga susbaranan hin pagkamatadong' ngan bangin hiya papag-ulión han iya mga hinipos nga manggad. Kundi an mga indiyo nga mga diwatahán nagmamatuod nga hi Simoun amo an manunulay nga diri nabulág han iya bihag. An mga magtinurawon nakiró hin may kahulugán nga maraot ngan nasiring:
-Kun bungkag na an tuna napaharayó an duron. May pipirá la, gutiay la hirá, nga nanhihiyom ngan waray aringasa.
Han pagkakulóp hi Simoun nagtugon han iya suruguon nga kun umabót in usá nga batan'on nga ginngangaranan kan Basilio pasudlon dayon. Katima hiní magsadá hiya didto ha sakób han iya sulód ngan mahamalangá hin mga halarom nga pamurubuot. Tikang masakit an kahimó han alahero inmuraura hin kaaringít ngan masubó, hinmalarom an kunót didá ha butnga han iya mga kiray. Bagá nakaób na; diri na tikig an ulo, natungok na. Nalilibáng nga uraura han iya mga panhunahuna nga waray pakabati nga may nagtuktok ha purtahan. An mga dabal liniwatan- Hi Simoun kinalasan:
-Dayón!—nagsiring.
Amo hi Basilio, kundi quantum mutatus!' Kun an linubarán ni Simoun ha sakób han duhá kabulan dako,
