la adto pinakakasiring nga liampó an adlaw nga kantuhan
ngan an mga Kristo nga sarwalan mga maghuruygo hin
tsapdiki nga nagkalulubasán kay itinayá an ira mga bado
ngan napirdi; kundi, diri magpapangulpot an mga prayle
yaná nga damo in iya bag-o nga nakarawat nga mga
baligya!
Tungod kay tugon hin usa nga probinsyal nga iya sangkay, hi Quiroga nagdiri pagpasulód ha iya mga baláy nga pahuruyguan hin liampó ngan hin tsapdiki han bisan hino nga indiyo nga diri daan nga kilala; an tipagkoronsul han kainsikan nahadlok nga adto nga mga banyaga manikas didto han salapi nga ira napirdi. Katima pagpahamutang han iya basar hin maupay, nga masasadhan hin dalidali ha uras han kadagmitan, nakiupód hin usa nga guardia veterana pagtara han haliputay la nga ginkakaantawán han iya balay ngadto han kan Simoun. Minamaupay ni Quiroga adto nga panahón hin paggamit han mga pusil ngan han mga kinaratsutso nga balá nga hinipos didto han iya almasin, sugad han tutdo ha iya han alahero: kay ginlalauman nga unina, ha mga sunod nga adlaw, magsusugo hin pagparekisa han mga baláy, ngan kadamo hin mapepreso, kadamo han tawo nga mapipirit pagbuhi han ira mga hipos nga salapi! Amo ini an paagi han una nga mga karabineros hin pagpasuhot ha sirong han mga baláy hin tabako nga tinustos ngan dinahón nga supak han balaod, ngan dagos pagpapalakát hin rekisa ngan an waray palad nga tagbaláy napipirit hin paghukip o pagbayad hin multa! An nakaraot kay, han hin-aaraan na ini nga paagi ngan pinakakasiring na nga maupay, ginkuha an tabako ha estangko ngan yaná say na man hinlalangkagán an mga armas nga igindidiri!
Kundi hi Simoun diri nakarawat hin bisita ngan nagpatugon la kan insik Quiroga nga diri la anay paglabtan adto nga mga butáng, salit hi Quiroga napasingadto kan don Custodio pagpakiana kun angay ba ig-andam nga armasan an iya basár, kundi hi don Custodio diri liwát nabibisita: hadto nga adlaw iya gintitinuunan in usa nga proyekto pagdepensa han bungto pananglit paglibutan hin mga kaaway. Nahanumdom hiyá kan Ben Zayb pangaro hin notisya, kundi han pakakita nga iní nga tawo napuputós hin armas patí ha ulo, kay say ngani ginagamit nga mga dat-og han mga papel in duduha
