hin mga susumaton hin mga milagro, igbibilíng ta na hin
mga anó la nga basahán nga waray kikilal'a! Kuhaa an
prayle ngan mawawará an kalalaki, ngan an darayawon
nga buhat ha panagibungto, mahangangadá han bisan
la hino; kuhaa, ngan an indiyo mawawagtang man; an
prayle amo an Amáy, an indiyo amo an Verbo; adto
amo an artista, ini an estatuwa, kay ngatanán an aton
pagkaasya, an aton panhunahuna ngan han aton binubuhat aton utang nga buót han prayle han iya pagtagád, han iya pagbudlay, han iya pag-unob ha sakób
hin tuló kasiglo basi mabalhin an dagway nga ihinatag
ha aton han Kinaiyá! Ngan an Pilipinas nga waray
prayle, nga waray indiyo, anó in hananabó han sadáng
pairán nga pamunuan didá ha kamót han kainsikan?
-Magkikinaon hin torta de cangrejos! binmaton hi Isagani nga nauuyám na han diskurso ni Pecson.
-Ngan amo ito an angay ta buhaton! Igo na ito nga mga diskurso!
Ngan tungod kay waray man uulpot an insik nga angay magdará ngadá ha ira hadto nga linuto, binmuhát in usa nga estudyante ngan mapasingadto ha sagod, ngadto han balkon nga naatubáng ha salóg; kundi hinmalik dayon nagsisininyason hin mga paurusahon.
-Gin-iinaw kitá; hinkit'an ko an karapigan ni P. Sibyla.
-Tuód? nagpakianá hi Isagani nga binmuhát.
-Waray na didá; han pakakitá ha akon lumakát.
Ngan dumuok ha bintana, sinmiplat ngadto ha plasa. Katima suminyas han mga kaupdanan nga dumuok ha iya. Ngatanán nagpakakitá nga nagawás, didá han purtahan han pansiteriya in usa nga diri kinikilala, ngadto pagsakay hin usa nga kotse nga naghihinulat ha ligid han bangketa. Amo adto an kotse ni Simoun.
Ahá! nakasiring hi Makaraig; an uripon han Vice-Rector ngan gintatamó han agaron han Heneral!
