-Waray magsinalangsalang!
-Nangangaro ako hin pulong!
-Nangangaro ako hin patis! sinmumpay hi Isagani.
-Ikadi an lumpiyá!
Ngatanán nangaro han lumpiyá ngan´hi Tadeo linmingkod nagpasalamat nga nakatima han iya tungod.
An linuto nga iginpahanungod kan P. Irene waray karuyaga hin maupay ngan say hinsakban ni Sandoval hin yambat pagkasiring:
-Nag-iinggat hin mantika ha gawás ngan ha sakob baboy! Maupay ipadurot an ikatuló, an torta de frailes!
An torta diri pa luto; hinbabatián pa an risidisi han mantika didá ha karaha. Ginpahimulusan inín paghinulat hin panginóm ngan pinangaro nga hi Pecson magyákan.
Hi Pecson waray tawatawa, nangudós, binmuhát, an tuman nga nakakapugóng han iya taraw'on nga kanán lurong, ngan say pagsubarón in usa nga predikador nga agustino nga hadto nga panahón nahasasangyaw, nagtikáng hin pagngurob daw sugad hin nagluluwás hin usá nga wali:
-Si tripa plena laudat Deum, tripa famelica laudabit fratres. "Kun an tawo nga busóg nagdadayig sa Dios, an tawo nga gutóm angay magdayig han mga prayle." Mga pulong ini ni Sr. Custodio nga ginluwás ha baba ni Ben Zayb, pahayagan El Grito de la Integridad, artikulo nga ikaduhá, linuróng nga ikausá kagatós kalim'an kagpitó."
Mga higugmaon nga kabugtuan ha kan Jesucristo:
An karat'an naghuhuyóp han iya mabang-og nga gininhawa didá han mga lunghaw nga baybayon ha Fraylandia, ha aton pa, Kapurupud'an han Filipinas. Waray pagsirang han adlaw kun diri mag-aningál in usa nga ataki, hin diri hibatián in usa nga sunglog han mga reberendos, benerandos, ngan predikandos nga mga katig-uban nga waray mga umurugop ngan waray sinasarigan. Tuguti ako niyo, mga kabugtuan, nga ha usa kadali magin-kabalyero andante basi say tumindog pangaway ha pag-ugop han mga magpakaluluoy nga mga birilhon nga katig-uban nga naghatag ha aton hin hibaró, basi ha pagpadig-on makausá pa han kasiringanon nga kun an tawo nga busóg nagdadayig sa Dios,
