kadam'an an akon lawas ha pagkasiríng: An akon higugma
namatay kay nangaway ha paghupót han mga katadungan
han akon tuna!
-Panguli na kita, iday, bangin ka sip-unón,-ginmuliat hadto nga uras hi donya Victorina.
Adto nga tingog nakapabalik ha ira ngadá han mga kamatuuran. Uras na han panguli ngan dará han kamaupay nga gawi gin-abiabi hi Isagani pagpasakáy han kotse, abiabi nga waray na an batan'on paghulát nga liwatón. Tungod kay an sarakyan kan Paulita, kaiyá nga say nanlingkod ha may maupay nga sandigan hirá donya Victorina ngan han sangkay ngan an duduhá nga nagsisihigugma say nagkalingkod didá han bangkuay.
An paghipakigkasakay ha usa nga kotse, paghitupád ha iya, pagsinimhot han iya hamót, paghisaping han iya panapton nga sida, pagkinita ha iya nga nagpipinanhunahuná, nakugos han mga kamót, dinidigos han silaw han bulan ha Pilipinas nga nakakahatag han bisan uraura kadiri hiró nga butáng hin dagway nga hamili ug makabibihag, asya in usa nga inóp nga waray pagpapamulata ni Isagani! Kamagpakaluluoy han namamagbinaktason, namamag-usaan, ngan napipirit pag-isol basi an malaksi nga sarakyan makaagi! Didá hadto nga pagpinadalagan han ira gin-aagian nga ubáy han baybayon, ha Paseo de la Sabana, ha puente de España, hi Isagani waray ibá nga hinkit'an kundi in usa la nga mahumok nga lirik hin ulo nga sinudlayán hin maangayon, nga natitima didto hin malubay nga liog nga natatago ha sakób han masilhag nga pinya. Usa nga brilyante nagkikiniro ha iya tikang didto han mitaybitay han gutiay nga talinga, daw bituon nga nabubutnga hin mga salapi nga dampog. Hi Isagani nakabati hin hagrani nga aningal nga napakiana ha iya kan don Tiburcio de Espadaña, an ngaran ni Juanito Pelaez, kundi bagá sugad la niya hin bagting hin mga lingganay nga hinbabatián tikang ha hirayo, daw mga tingog nga diri hinsasayuran didá hin usa nga inóp.
Nagkinahanglan nga pasabutón hiyá nga inmabót na hira ha plasa ha Santa Cruz.
