la pagpakpak, nagkikinita han paguwa kundi an buot nakadto ha hirayo.
Hi Paulita inalpan hin kasina ngan nangabugho; nahagugugma hi Isagani hadto nga mga mag-igat nga mga aktris? Ini nga panhunahuna nakaraot han iya buot ngan waray na pamamati han mga pagdayaw nga iginagawad ni donya Victorina han iya pinalabi.
Hi Juanito nagpapatootoo; usahay napiling han ulo tigaman hin diri paghiayuni ngan ha gilayon binabati in mga igham ngan mga ngurutob ha kapiliwan; usahay natawa, natangdo ngan dagos hadto ngahaw babatia in mga parakpakay. Hi donya Victorina nabibihag ngan pati nakahunahuna hin nakadamo nga kaduwas pumakasal hiya han batan’on kun mamatay hi don Tiburcio. Hi Juanito maaram hin pranses, hi de Espadana diri! Ngan magtikang hin pagbiniladbilad! Kundi hi Juanito waray aabat han pagbalhin hin tactica han ginang, kay nahamamalanga pagkinita hin usa nga komersyante katalan nga iginkakahirani han konsul suizo; hi Juanito, kay nakakita hadto nga duha nga naghihimangraw hin pranses, say gintutundog an ira mga nawong ngan nakakatultol an tarantado.
Nagsunudsunod in mga taragpo, nagkaliwanliwan an mga tinawo, mga gupon ngan mga budol sugad pananglit han bailif ngan hi Grenicheux, in mga dungganan ngan magpakiaangayon sugad han marques ngan ni Germaine; an kadam’an nagtinawa hin patakas han suntok ni Gaspard nga para hin matalaw nga Grenicheux kundi say naigo an buutan nga bailif, ngan han tal-ob la hini nga buhok nga nahalasik, ngan han pagsalamok ngan kaburuka nga amo na an pagturusi han telon.
—Ngan an cancan?—napakiana hi Tadeo. Kundi an telon binutong liwat gilayon ngan an sunod nga taragpo amo in usa ha pamaligyaan hin mga suruguon, nga may tutulo nga lurungan nga libot hin mga bandirahay ngan may mga pasabot nga nasiring servantes, chochers ngan domestiques. Hi Juanito nagpahimulos han panahon ngan dinako an tingog ha kan donya Victorina, basi makabati hi Paulita:
—Servantes karuyag sidngon mga suruguon, domestiques mga binalay...
—Ngan ano man in ginkakalainan han servantes dida han mga domestiques? —nagpakiana hi Paulita.
