Ginhihiruhimangraw in magnetismo, espiritismo, mahika ug ibá pa ngan an mga pulong nag-aapwad daw an mga sipól ngan mga bola hiton mga gupón: ira ilinalabog ha igbaw ngan hirá la liwát in nasaló.
Hadto nga tuig say nalilisangan han mga tawo dida ha feria ha Quiapo in usa nga ulo, nga ginngangaranan nga esfinge, bisan kun diri tultol, nga ginpapaguwa ni Mr. Leeds, usa nga amerikano. May haglapad nga paskin ha mga kuta han kabalayán, mga urusahon ngan mga ihurugós, nga nakakaaghat hin pag-usyuso. Waray pa hadto ha ira may nakakitá kanda Ben Zayb, P. Camorra, P. Irene, P. Salvi, hi Juanito Pelaez pa la hadto in nakakitá ha usa kagab-i ngan iya iginsisinumat hadto nga pundok an iya mga hinpausahan.
Hi Ben Zayb, bahin ha kaperyodista, nagbibiniling hin kasayuran nga kinaiyá la; hi P. Camorra nasiring nga buhat adto han diyablo; hi P. Irene nagtitinawa; hi P. Salvi amo la gihapon, nabuot.
-Kundi, padre, an diyablo diri na mapakanhi; igo na kita nga mananag-unáy kahulog...
-Kundiri, waray kasayuran...
-Kanan kinaadman...
-Kinaadman na liwát! Punyales!
-Kundi, pamati daw, ipakikita ko ha imo. Aadá la ha mga matá pagkitá. Waray pa ako hito nga ulo pakakitá, ambot kun inuunano nira pagpaguwá. Ini nga senyor-tinutudlok hi Juanito Pelaez,-nasiring nga diri sugad han iba nga ulo nga nagyayakán nga kabatasanan say iginpapaguwá. Bangin! Kundi an tinikangan amo gihapon: aadá la ha pangitaán; hulát anay, mabutang hin espeho sugád hini, espeho liwát ha luyó, an kahimó ipalaladawan... amo an siring ko, usa gad la ini nga problema ha Fisica, waray ibá!
Ngan dayon pamalós ha mga bungbong hin mga espeho ngan pagturutugbangon, pinapapanhilig, ngan tungód kay nalutáw an iya iginsisinumat, nagsiring:
-Amo gud an pulong ko, waray ibá, aadá la ha pagkitá, ha mga matá!
-Kundi ano nga mga espeho in imo karuyag kun hi Juanito nasiring man nga ito nga ulo aadto ha sakób hin usa nga kaha nga itinutungbaw ha lamisa!... Naabat ako didá hini hin espiritismo kay an mga espiritistas unob nagamit hin mga lamisa, ngan an bagá ha akon, hi P.
