kanian say kipapasen ko natan singa sakey a taga árum a bansa ya ni agto amta no kapigan tan no antoy inateyan nen amá to!"
"Ah!" kuanton may teniente.
"Iner so kawalaan yo a, akin et ag kayo nantelegrama?" kuay tepet nen Donya Victorina. "Nen nankasal kami nantelegrama kamid Pinyinsula."(1)
"Sayay unor a duay taon wala ak, áli, ed Norte na Europa; diad Alemania tan Polonia Rusa."
Si Doktor De Espadaña ya anggad natan et agtoni binisuat so bibil to, inisip ton kanepegan met ya onsalita.
"Wa..... Walay akabat kod España ya Polako ya Va..... Varsovia ya manngaray Stadtnitzki, no kasi ta agak nalilingo; anengneng yo pa lági?" kuanton anepet a singa nasisikig tan binmalangay lupa to.
"Nayari," kuanen Ibarra ya mapappagusto, "balet ta agko nanunotan ed sayan bekta."
"Ay, agyo ni . . . . . nisalat ed arum!" kuanen Doktor ya intuloy a singa apabiskeg toy linawa to: "say buek to singa lawari balitok tan pikewet so panangastila to."
"Mainomay komon sirin a narumog, balet ta agkon balot akapansalitay kastilad man likod labat ed pigaran ayaman day konsul."
"Panon siri pitatalusan yo ey?" kuanton mankelaw nen Donya Victorina.
"Ikakanak, áli, so salitad saman a bansá."
"Amta yo met so Inglés?" kuanton tinmepet nimay dominiko ta nanayam ed Hongkong tan amta ton maong so tatawagey Pidgin-English, (2) salitay Inglés ya apikpikewet a sikatoy amta ray intsik.
"Sakey taon kod Inglaterra ed utel day totoon say amta ra salitay Inglés labat."
(1) Say panangingaran diad Pilipinas no maminsan ed España, Pininsula. Si Donya Victorina balet aliway panamitla to.
(2) Sikatoyay pananawag na panagsalita ray intsik na English nen saman lalo ray abeban inkatoo. Pakapatnagay kaarawi panangibalikás day sálitay English say pidgin, business et mairap da lantin bitlaen. Kanian say talos na Pidgin English, salitay english ya ikakana ed komersio.
