anggano wadia! Kalokoan labat iratay kasabisabi ra dia. Palabas yoy pigay bulan, mansalat kilay kanunotan no akadágop kilad dakel a pispista tan sayawan, tan inmogip kilad dalagan tan akapangan kilay dakdakel a tinola."
"Satay ibabaga yon tinola satan imay bonga ya singa rosas na loto ya panmaliwen toray totoon singa..... maililingoan?"
"Anto tay loto ni loteria!" kuanen pári Dámason inmebat a manelek; "singa kayo manotugtug na bombo. Say tinola, manok ya inggisan sinabawan a nanlaok na batatas odino apayas. Kapigan lay insabí yo día?"
"Apat agew la," kuanton may tubonbalo ya singa abaingan.
"Linma kayo dian imbaki Gobierno ya mankimey?"
"Andi, Sinyor: linma ak dian gastos kon díli ta labay kon kabaten so bansa."
"Saló, nidumadumá kila!" kuanen pári Dámaso ya sankanengneng ton singa ousisaen. "Onla ki dian gastos yon díli nisesengeg ed kalokoan! Talagan sakey a panagkelawan! Satan a karakel na libro. . . . no walay daiset a pakatalus. . . . akamayamay so nanggagaway libron makakapal! No walay anggan melamelag ya utek. . . ."
"Kuanyo man pári Dámaso," kuanton sinmalangat ya andi pasantabi may dominiko ya pinultot toy tungtongan," a duamploy taon kayon nanayam ed báley na San Diego tan tinaynan yo. . . . akin agyo apaknaan iman a báley?"
Sayan tepet a ginawad tanol na bosis ya anggapoy walawalá tan singa ni ingen mangingngiras a tono, pinaer toy sayaksak nen pári Dámaso tan tinmondan manelek.
"Andi!" kuanton inmebat ya akasiglá tan biglan sinmaral ed panyodyurongan to.
"Ansakisakit angankon taynan so sakey a báley a nanayaman a duamploy taon, a kabkabat lan maong a singa kawes a díli," kuanton nansalita lamet imay dominiko ya singa nin siansia andi kakabaliksan so ibabaga to. "Siak nilikliknak so insipot kod Camiling anta pigpigay bulan kod man. . . . gagaween da ya balet na
(1) "Makapalpalek kayo," so labay ton ibaga.
