ಜೋಕ್ಲೆಗ್ ಜೋಕ್ಲೆ ಪದರಂಗಿತ ರಚನೆ ಆವೊಡುಂದು ಬೋಡಾಯಿನ ಕಾರ್ಯಕ್ರಮೊಕ್ಲೆನ್ ಆನ್‌ಲೈನ್‌ಡ್ - ಯುಟ್ಯೂಬುಡು ಶುರು ಮಲ್ತೆರ್. ದೇಶ-ವಿದೇಶೊಡು ತುಳು ಜೋಕ್ಲು ಪಾಲುಪಡೆಪಿಲೆಕ್ಕ ಆಧುನಿಕ ತಂತ್ರಜ್ಞಾನನ್ ಉಪಯೋಗ ಮಲ್ತೆರ್. ಅಂಚನೆ ತುಳುಲಿಪಿನ್ ಕಲ್ಪರೆಗ್ ಕಜ್ಜಕೊಟ್ಯ ಸಂಯೋಜನೆ ಮಲ್ತೆರ್. ತುಳು ಲಿಪಿತ ಅಸ್ತಿತ್ವೊಗು ಪುನರ್ಜನ್ಮ ಕೊರ‍್ದು ಮಾತ ದ್ರಾವಿಡ ಭಾಸೆದಲೆಕ್ಕನೆ ನಮ್ಮ ತುಳು ಬಾಸೆ ಮಾನ್ಯತೆ ಪಡೆಯರೆಗ್ ಬೋಡಾಪಿನ ತಯಾರಿ ಮಲ್ತೆರ್. ಎಲ್ಲೆದ ತುಳುವೆರ್ ಇನಿತ ಜೋಕುಲು-ಪಣ್ಪಿ ಸತ್ಯೊಗು ಸರಿಯಾದ್ ತುಳುವಪ್ಪೆನ ಸೇವೆ ಮಲ್ತೊಂದುಲ್ಲೆರ್. ಇನಿತ ಆಡಳಿತ ವ್ಯವಸ್ತೆಡ್ಲಾ ನಮ್ಮ ತುಳುಬಾಸೆಗ್ ಮಾನ್ಯತೆ ತಿಕ್ಕುಲೆಕ್ಕ ಪ್ರಯತ್ನ ಮಲ್ತೊಂದುಲ್ಲೆರ್. ತುಳುವೆರೆ ಚಾವಡಿದ ತುಳುವೆರ್. ಇತ್ತೆ “ಜೋಕುಲೆ ಉಜ್ಜಾಲ್” ಪಣ್ಪಿ ಪ್ರಕಟಣೆ ಮಾಮಲ್ಲ ಪ್ರಯತ್ನ. ಸುಮಾರ್ ೩೦ ಕವಿಕಲು ಬರೆಯಿನ ಸುಮಾರ್ 300 ಜೋಕುಲೆ ಪದ ರಚನೆ ಮಲ್ದಿನಕೆಲೆನ್ ಒಟ್ಟು ಪಾಡ್ದ್, ಪೊಸ ಪೊಸ ಪ್ರೇರಣೆ ಕೊರ‍್ಪಿನ ಕಾರ್ಯ ಈ ಮೂಲಕ ಆವೊಂದುಂಡು. ಐಟ್ ಪ್ರತೀ ಪದೊಕು ತುಳು ಲಿಪಿಕ್ ರೂಪಾಂತರ ಮಲ್ದಿನವು ತುಳು ಸಾಹಿತ್ಯ ಚರಿತ್ರೆಡೆ ಎಡ್ಡೆ ದಾಖಲೆ. ಈ ಉಜ್ಜಾಲ್‌ಡ್ ಬಗೆ ಬಗೆತ - ಅಂಗನವಾಡಿಡ್ದ್ ಹೈಸ್ಕೂಲ್ ಮುಟದ ಜೋಕ್ಲೆಗ್ ಬೊಡಾಪಿನ ಪದೊಕ್ಲೆನ್ ತೂವೊಲಿ. ಆಂಡ ಬರೆದ್ ಬರೆದ್ ಸುಧರ‍್ನೆ ಆವೊಡು. ಜೋಕ್ಲೆ ಮನಸ್ಸ್ಗ್ ರುಚಿ ಆಪಿಲೆಕ್ಕ, ಪೊಸ ಪೊಸ ಪ್ರೇರಣೆ ಕೊರ‍್ಪಿಲೆಕ್ಕ, ಜೋಕ್ಲೆ ಬಾಯಿಡ್ ಏಪಲಾ (ಪದೇ ಪದೇ) ಬರೊಂದಿಪ್ಪಿಲೆಕ್ಕ, ತುಳುನಾಡ್, ತುಳುಬಾಸೆ, ತುಳುಪರಂಪರೆಸಂಸ್ಕೃತಿದ ಅಭಿಮಾನ ಪುಟ್ಟಿ ಲೆಕ್ಕ ಸುಲಾಬೊಡು ಕುಷಿ ಕುಷಿಟ್ ರಾಗಮಾಲೆ ಕಲ್ಪಿಲೆಕ್ಕ, ಉಜ್ಜಾಲ್ ತೂಂಕುನಗ ಆಪಿನ ಕುಷಿ - ಮೈಮರ್ಲಾವುನ ಅನುಭವ ಆವೊಡು. ಇಂಚಿನ ಗುಣಮಟ್ಟದ ಜೋಕ್ಲೆ ಪದೊಕ್ಲು ಈ ಜೋಕುಲೆ ಉಜ್ಜಾಲ್‌ಡ್ ದಿಂಜ ಉಂಡು. ಜೋಕುಲೆ ಪದೊಕ್ಲೆನ ರಚನೆ ಮಲ್ತಿನ ಸಾಹಿತಿಲೆಗ್, ಸಂಯೋಜನೆ-ಸಂಪಾದನೆ ಮಲ್ದಿನ-ಪ್ರಕಟ ಮಲ್ದಿನ ತುಳುವೆರೆ ಚಾವಡಿದ ತುಳು ಬಂಧುಲೆಗ್ ಸೋಲೊಯ್ತಿದ್ ಸೊಲ್ಮೆ ಸಂದಾವೆ. ಈ ಪೊಸ ಉಜ್ಜಾಲ್‌ಡ್ ಕುಲ್ಲುದು, ತೂಂಕುದು ಕುಷಿ ಕುಷಿಟ್ಟ್ ತುಳು ಬಾಸೆ, ತುಳು ಲಿಪಿ, ತುಳು ಪದೊಕ್ಲೆನ್ ಕಲ್ದಿನ ಅಂಚನೆ ಕಲ್ಪುನ ತುಳು ಜೋಕುಲು, ಕಲ್ಪಾವುನ ಅಪ್ಪೆ ಅಮ್ಮೆ, ತಗೆ, ತಂಗಡಿ, ಬಂಧುಲು ಮಾತೆರ‍್ಲ, ಊರು ಪರವೂರ್ದ, ದೇಶ-ವಿದೇಶೊದ ತುಳು ಅಭಿಮಾನಿಲು ಈ ಪ್ರಕಟಣೆದ ಉದ್ದೇಶನ್ ತೆರಿದ್, ಸ್ವೀಕಾರಮಲ್ತ್ದ್ ತುಳುಬಾಸೆದ ಬುಲೆಚಿಲ್‌ಗ್ ಕಾರಣ ಆವೊಡು, ಈ ಮಾಮಲ್ಲ ಪ್ರಯತ್ನ ಸಾರ್ಥಕ ಆವೊಡು, ಸಫಲ ಆವೊಡುಂದು ನಂಬ್‌ದಿ ದೈವ ದೇವರೆಡ ಪತ್ತ್ ಬೆರೆಲ್ ಜೋಡ್ಸಾದ್ ಪ್ರಾರ್ಥನೆ ಮಲ್ಪುಗ. ತುಳುನಾಡ್ ತುಳುಬಾಸೆ ತುಳುವಪ್ಪೆನ್ ನೆನೆತೊಂದು ಸಂದಾವ ಸೊಲ್ಮೆಲೆನ್ ಎಂಕ್ಲು (ಸೊಲ್ಮೆಲು-ಜೀವನ ಪಾಡ್ದನ)
ಕನರಾಡಿ ವಾದಿರಾಜ ಭಟ್
ಸಂಕ್ರಾಂದಿ (೧೫-೦೧-೨೦೨೩)
vi
ಜೋಕುಲೆ ಉಜ್ಜಾಲ್
