ಶ್ರೀ ಶ್ರೀ ಮೋಹನದಾಸ ಪರಮಹಂಸ ಸ್ವಾಮೀಜಿ, ಶ್ರೀ ಧಾಮಾ, ಮಾಣಿಲ, ದ.ಕ. ತುಳು‌ಬಾಸೆದ ಏತೋ ಪದಕುಲು ಮಾಯ ಆದ್ ಪೋವೊಂದುಪ್ಪಿನ ಪೊರ್ತುಡು ಬೆಂಗಳೂರುದ ತುಳುವೆರೆ ಚಾವಡಿ ಜೋಕುಲೆಗಾದ್ ಪದ ಸಾಹಿತ್ಯದ ಮಿತ್ತ್ ಗೇನ ದೀದ್ ಮಲ್ತೊಂದುಪ್ಪುನ ಕೆಲಸ ದುಂಬುದ ಜನಾಂಗೊಗು ಮಾಜಂದಿ ನೆಂಪಾದ್ ಒರಿಪುಂಡು. ಎಲ್ಯ ಉಪ್ಪುನಗನೇ ಲತ್ತ್ ಜೋಕುಲೆಗ್ ಇಂಗ್ಲಿಷ್ ಪದ ಪಂಡ್ ದ್ ಜೆಪುಡಾವುನ‌ಸಂಸ್ಕೃತಿನ್ ಉಂತಾದ್ ಮುದ್ದು ಮನಸ್ಸ್ ದ ಜೋಕುಲೆಗ್ ತುಳು ಬಾಸೆಡ್ ಸುಲಭದ ಪದ ಪ್ರಯೋಗ ಮಲ್ತ್ ದ್ ತೆಲಿತ್ ದ್ ನಲಿತ್ ದ್ ಪಂಡಿನ ಪದೊಕ್ಕು ಬಾಲೆದ ಮೋನೆಡ್ ತೆಲಿಕೆ ಬರ್ಪಾನಗ ಪೆದ್ದಿ ಅಪ್ಪೆಗ್ ಏತ್ ಕುಷಿ ಕೊರ್ಪುಂಡಾ, ಬಾಲೆಲಾ ಆತೇ ಕುಷಿಟ್ಟ್ ಮೈ ಕೈ‌ಕಾರ್ ಕುರ್ಕಾದ್ ಕುಷಿಟ್ಟ್ ನಲಿಪುಂಡು. ದೃಷ್ಟಿ ಇತ್ತ್ಂಡಲಾ ಎದುರುದ ಸಾದಿ ಕತ್ತಲೆ ಆದ್ ತೋಜಿಂಡ ಭವಿಷ್ಯ ಮಸ್ಕಾದ್ ಅರ್ಥ ಇಜ್ಜಂದಿ ಕತ್ತಲೆದ ಬದಕಾಪುಂಡು. ಅಂಚ ಆಯೆರೆ ಬಲ್ಲಿ. ಕತ್ತಲೆನ್ ನಿಂಗ್ದ್ ಸಮಾಜೊಗು ಮೆನ್ಕುನ ಬೊಲ್ಪಾದ್ ತೋಜಾವುನನೇ ಮನುಷ್ಯ ಜನ್ಮದ ಸಾರ್ಥಕತೆ. ಈ ನಿಟ್ಟಡ್ ತುಳುವೆರೆ ಚಾವಡಿ ತುಳು ಬಾಸೆನ್ ಒರಿಪಾಯೆರೆ, ಬುಳೆಪಾಯೆರೆಗಾದ್ ಕಾಳಜಿಡ್ ಬಾಸೆದ ಮಿತ್ತ್ ಮೋಕೆ ಬರ್ಪಾವುಲೆಕ್ಕ ಜೋಕುಲೆಗಾದ್ ಶುರು‌ಮಲ್ತಿನ ಮಾಮಲ್ಲ ಕೆಲಸ ಮಲ್ಪೆರೆ ಕೈಪಾಡ್ದಿನ ದುಂಬುದ ಜನಾಂಗೊಗು ಬೊಲ್ಪುದ ಸಾದಿ ಆವುನೆಕ್ಕ್ ಸಂಷಯ ಇಜ್ಜಿ. ಈ ಎಡ್ಡೆ ಕೆಲಸ ತುಳು ಪದ ಸಾಹಿತ್ಯೊಗು ಮಲ್ಲ ಕೊಡುಗೆ ಆವಡ್. ಈ ಮಲ್ಲ ಕೆಲಸೊಗು ಕೈ ಜೋಡಿಸಾಯಿನ ಸಾಹಿತಿಲೆಗ್, ಪ್ರೋತ್ಸಾಹ ಕೊರಿನ‌ತುಳು ಬಂಧುಲೆಗ್ ಬೊಕ್ಕ ತುಳುವೆರೆ ಚಾವಡಿದ ನಿಷ್ಟೆಡ್ ಕೆಲಸ ಮಲ್ಪುನ ಮಾತ ಕಾರ್ಯಕರ್ತೆರೆಗ್ ಶ್ರೀ ಮಹಾಲಕ್ಷ್ಮಿ ದೇವೆರ್ ಶ್ರೀ ರಕ್ಷೆಯಾದ್ ಕಾಪಾಡಡ್ಂದ್ ಎಡ್ಡೇಪು ಬಯಕೊಂದುಲ್ಲ. ಶ್ರೀ ಹರಿನಾಮ ಸ್ಮರಣೆದೊಟ್ಟಿಗೆ
ಶ್ರೀ ಶ್ರೀ ಮೋಹನದಾಸ ಪರಮಹಂಸ ಸ್ವಾಮೀಜಿ
