Моткодезь, машнетезь совась козейканзо мельга кудов. Аганя чатьмонезь кадовсь кардаз куншкантень, вакссонзо очкиненть кандызе тувонь кардов, сорновтызе рунгонзо, ды лись орта лангов.
Чувтомсь ортанть лангс. Мерят прок мезек емавтсь ды те емавтось саизе сонзэ эрямонзо. Сон эзь арьсе течинь сизевтедензэ, эзь арсе исень чиденть, эзизе маря опаня чокшненть паронзо. Сэтьместэ вансь тов, ков якстерестэ валгсь чизэ.
Виренть нучк, пандонть прясто ацавсь велентень ки. Виренть чирестэ те кинть лангс появась ломань. Сон стамбарнэ, прок нузяксто валгсь велентень. Аганя неизе те ломаненть ды учось, кода юты икельганзо, штобу содамс, кие сон.
Ломанесь яла шаштсь малав. Аганя бажась ве ендо содамс. Вансь сельмень апак коншта. Эзь содав. Эзь моле эсь велень ломань еновгак. Сонзэ лангсо ульнесь каладо пальта, бокав чавовт кочкаря кемть. Кирга лангозонзо новольсть прячерензэ. Нусманя чамасонзо мень бути седейс токиця ризкс.
Ансяк пачкодсь, лоткась Аганянь видес. Пейдезь варштась лангозонзо. Аганя абунгадозь аштесь икелензэ ды мик дивазевсь.
— Вай авакай, вере пас корминець, — эсь сельмезэнзэ апак кеме пшкадсь Аганя ды кедензэ вачкодинзе, — Астакан, тонь косто кандыньзеть вере пазось?
Астакан мольсь Аганянь вакс, виздезь веньстизе кедензэ, пшкадсь:
— Уфимской кантонсто. Эринь Романовской куторсо, — столыпинецень кедьсэ. Ломантне пек сюпавт, можна ульнесь эрямс, но родной шачома велентень седеесь терьди. Коть тетясь сыре, яла теке жаль маряви.
— Тетят кулось... — евтась Аганя. Мейле прок сонсь янксесь, мейсь евтызе.
Астакан нолдызе прянзо, кедезэ нолаштсь Аганянь кедьстэ. Сонсь теке кельмень чавовт лопа рипакадсь Аганянь икелев.
4
