Барансь неизе боярсть пеелень човамодо, и чаркоць — сонзэ печкеме арсить. Мольсь боярсть икелев и мери: „Нолдамак монь остатка раз ведь чирева якамо.”
Боярсь мери: „азё!” А соньсь мольсь мельганзо вантлеме.
Сась барансь ведь чиреньтень. Яки ведь чиреванть, аварьди и сеери:
— Бе, патяй! бе, патяй! |
Патясь ведь потмакстонть серьгець каршонзо:
— Ох, ялакскем, ойминем! |
Мариньзе сынст боярсь. Кирнавць вецтень и таргизе патянть. Сась кудов, сюлмсизе яга-бабань тейтерьсть сисемь иесэ айгоронь пулос и панизе айгорсть дикой степс, а патянть саизе эстензэ никс.
ТУМО-ПЕТЯ.
Ульнесь вейке сюпав эрзя. Лемезе сонзэ Петя, прозваниязо Тумо. Сон киньгак эзь жаля, ансяк ярмак таштась. Весть Тумо-Петя моли веле юткова. Друк сонзэ ярмаконзо ёмасть. Кармась ярмакнэнь вешнемест. Вешнесь, вешнесь — эзиньзе муе. Озась шочко ланкс и кармась аварьдеме. Аварць, аварць — матедевсь. Кода сон сыргойсь, мольсь ваксозонзо цёрыне и мери:
— Мейсь, покштяй, аварьдят?
— Эх, цёрынем, ярмакон ёмавтынь!
— Ламольть?
— Комсьветее целковой!
