— 6 —
* * *
Менельсь валом-валом ацавсь равжа туцяса. Вармась, ков мезэ, вийнць и вэшксь, кода нюди почкса. Дуцэтнэ, ков мезэ, тустомсть и увнасть, кода лэйняса шада вець. Шинясь шопочнесь. Кожфть эзда яфоць пизем шинэ.
Стэсь Тюлэй васцтонза и тусь велеть шири. Варжась менелти, а менелсь, кода равжа копона нюрьксь велькссоннза. Пиземсь вов-вов туй. Дуцятнэ лакасть тов и сей. Кифчець ёндолсь. Валдомсь менелсь. Цяторгоць атямсь и кармась путьксема эчкэ пизем...
— Ков тэни молян удома? — кизефтезэ эсь прянц Тюлэй, — ков, тэни молян удома?
Цють исть ту танга Тюлэйнь сельмэ веденза, но тяни крдезень. Кармась аськоляма сон оцю аськолксса велеть кувалмос.
— Аф нолдасамэсть удома? — марявсь шюванэняста вайгэлец.
— Архт сяда тов, — марявсть уторозонза эчкэ алэ вайгэльхть, — тиннь эздодонтт лама.
Етазь сембэ велеть, а удома васта изь му. Машцть ёнза, аф содасы мезэ и тиймос. Пиземс, ков мезэ, виенць. Изь ляд коськэ сюренэ лангозонза, станэ валондозэ. Ашкодозэ зырнатомась (вачкатомась), кода маштыкс урмаса. Чакорфса марявсь, кода пейнза фкэфкась вачкиихть. Виец машць. Пильгонза вихца аськолэсть.
— Ков тэни молян? — вихца пшкэць истейнза.
Вармась, ков мезэ, вийнць негнэ сяда вишкста, уфась нльнэ куд стенатнэ вжнасть. Исцэ марэ сонцкэ Тюлэй кода вармась кармась сэряфтомонза тингэ фтальт шири. Кода пульфонь яфодезэ латальт орхтанц алу.
