Page:Татю (Т. А. Раптанов, 1933).djvu/34

From Wikisource
Jump to navigation Jump to search
This page has been proofread.


брас лисемс шка арась. Шкаяк муевель — а лисят. Ламо сельведь правсь вальмало.

Татю лиссь кардазов. Панжизе ортанть. Орта чиреванть варштась ушонтень. Пиземеденть мейле кись кшнакс таргавсь порядканть кувалт. Тувонарось рипакадозь сорновтнесь росанть. Покш сэдь песэ нурьгамозь сюкунясь сыре калесь. Сон ламо иеть ютавты тоншанзо горянзо те покш кинть чиресэ. Сон апеняци кияк лангс. Куть мартонзо месть иляст тейне. Алкукскай апеняциця. Ютыця синьди тарадонзо, аштимадо лоштясы локшосо. Кие бутим цяподизе узерцэ боканзо. Яла теке эри. Эри истя, кода эрить церань коморс сювордавть бедной аватне. Эрить мик вал пелить евтамо эсист кисэ.

Кудо бокатнесэ — шочко лангс колмонь таркат пуромсть ават, церат. Эрьва кие капше евтнеме од кулят. Татю хлопадизе ортанть ды мольсь сайсь берема пеньгть. Кандумсто правсь полена. Карпа мольсь удалонзо. Сон кепедизе поленанть ды гуйкс вешкезевсь.

— Ансяк тонь мельга урядак. Косо мезе теят сэзэньс...

Зверень кортавтось прок пеель пезнась седеезэнзэ. Те эрьсесь эрьва чистэ, эрьва чассто ды эрьва минутсто. Секс Татюнь майшсь моцезэ коронь кирьдемс.

— Мейсь эйсэнь калгатад? Мень чумо тенк теинь? Тон самай яд марто зверят! Пандя! Мон эщо вишка пингстэ максынь вал, што тынянк, велень порийть, кежен пандсынь. Сонсь кундызе шачозо, кармась авардеме.

— Ах, сивезь сельме! Иля пшкадтькак чачк сезьдянзат. Варштака пильгало соркс а путтанзат! — Карпа чийсь Татюнь вакс, баксурдызе плетешкатнеде ды — мастор вакс.

Седе мейле ирьдекс ланга лоштизе празь поленасонть. Кудостонть, прок пропка, ертовсь Кулина. Нельгизе кедьстэнзэ пеньгенть.

— Карпа. корменецькем, иля тейне ломань пейдемат. Кунцоломак!

Те каподсь кавксосо кодавт кшнань локшо. Сехмадизе бабанть ды давай керямо Татюнь. Керась эйсэ-

32