Page:Од пингень вий (Т. А. Раптанов, 1934).djvu/9

From Wikisource
Jump to navigation Jump to search
This page has been proofread.


— Мон тонеть, товарищ Глушков. — Филя венстизе крайкомсто конёвонть.

Глушков сювордызе конёвонть, стамбарнэ калавтызе ды ловны: «Тов. Глушков! Устрой его, он член нашего союза, я его знаю — парень надежный». Глушков варштась Филя лангс ды стакасто укстазевсь. Филянь алсе турвазо сорнось, сельмензэ тусть стенатнева мезень бути вешнеме. Глушков стиксэль столенть экшстэ, мекев озавсь ды коцькердезе човонензэ.

— Нать а надият муемс монень робота? — пелезь пшкадсь Филя.

Глушков пейдезевсь.

— Роботанть мусынек...

Глушков ванькстазевсь, Катя пейдезь варштась ды пшкадсь:

— Сон «Красной озерав» роботамо моли?

— Ки?

— Вана те цёрась.

Глушков эщо варштась Филя лангс, мейле пейдезевсь Катя ёнов. Катя кеместэ неждизе мештензэ столентень ды утякстни рунгонзо эйсэ. Филя аштесь прок вирь чиресэ пиче. Мазый ды куратной рунгозо неждезь столь бокантень.

Катя содась, што сон моли робочкомонь председателькс «Красной озерав». Седе мейле Катянь икелев теевсь роботамонь план: «Пурнынзе весе совхозонь робочейтнень, теи тенст доклад профсоюзонь задачатнеде, вете иень планонть ниле иес топавтемадо. Робочейтне кургост автезь кулсоныть ды цяпить».

7