ФИЛИЯНЬ КИЗЭ*
— Которой робочкомонь председатель? — кевкстизе Филя столь экшсэ сёрмадыця тейтеренть.
Тейтересь кепедизе кудряв-пондакш прянзо, сельмензэ прок лемзёрт кившкадсть.
— Вот его стол, но его нет! — прок письмар вешкезевсь чова вальгейсэ ды чаравсь прясонзо тейтересь. Теде мейле кудрятне сравтовсть лавтовонзо ланга, комась мекев, раужо сельмензэ пезнасть ашо конёвонтень.
Филя озась столь пентень, покш паро мельсэ раны тейтеренть лангс. Филя васенцеде пачкодсь ошов ды такода муизе умарень-эмежень комбинатонть. Сонзэ сельмензэ икелев арасть Самар ошонь колмо этажсо кудотне.
«Молян, муян ошсто робота, карман тосо роботамо. Тееван промышленной робочейкс, карман покш фабрикань-заводонь строямо. Вана мезес монь ули мелем». Чи валдокс валовсть истят арсематне пря потмозонзо. Умок уш мелезэ ульнесь туемс велестэ ошов, ансяк эзь сода, кода те тевенть ушодомс.
4
