Page:Од пингень вий (Т. А. Раптанов, 1934).djvu/54

From Wikisource
Jump to navigation Jump to search
This page has been proofread.


— Алкукс. Давай, кодат вопросот?

Сынь весе совасть робочкомонь кабинетэнтень. Робочейтне прок пултонь посадт ацавсть наратне ланга, корныть — судост стомавсть. Робочкомсонть чеерень толкс цитни светиласто толось. Катя озась столенть экшс.

— Минек вопросонок кавто. Кувать аштемс лангсост а сави.

— Виде, давай седе курок. — Катя таргась портфельстэнзэ отношения, кармась ловномонзо.

— Вана минек совхозс максть вейке путёвка курсов — совхозонь директоркс. Монь койсэ эряви кучомс Филянь, Кузнецов путёвканть идесы. Сонзэ мелензэ-превензэ вельде строинек не барактнэнь. Ней аволь ансяк клубонок ули, ней ули робочкомонь комнотанок, ули совхозсонть столовоенек, кооперациянок, банянок...

— Дайте мон кортан. — Катянь валонзо трокс каявсь Нарчук.

Катя абунгадсь. Зярдояк истямо арасель Нарчук.

— Филянень те курсов молемась сы пек ладс. Прядсынзе курстнэнь колмо иень ютазь ды сы эстенек директоркс. Те эщо а ламо. Эряви якавтомс, штобу максовольть тензэ орден.

Филя пейдезевсь.

— Те батраконтень награда максомс эряви. Сондензэ мон ловнынь «Волжской Коммунасто». Тосо кеместэ ёвтазь: «Герой труда Кузнецов Ф.»

— Кучомс!

— Кучомс!

— Кучомс!

52