Page:Од пингень вий (Т. А. Раптанов, 1934).djvu/22

From Wikisource
Jump to navigation Jump to search
This page has been proofread.

— Шумбрат, Кузнецов ялгай!

Катя кирнявтсь таркастонзо, кеместэ сювордызе Филянь вить кедензэ.

— Вана, — кармась кортамо Филя, — робочейтне нокить туиме совхозстонть, а косто саемс кши, сахор ды эщо кой-мень продуктат. Минь арсетянок организовамо кооперация, секс сынь тонеть. Мон а содан, кона ёндо кундамс.

Филя арасель истямо тевсэ зярдояк, эзь кортне сёрмас содыця ломань марто, визди ваномс Катянь сельмс, визди Катядо. Ледсть мелезэнзэ неть иетне, зярдо роботась кулаконь кедьсэ, ванкшнось стадат. Велесэ эзизь лово ломанькскак, покордылизь мейсэ понгсь. Не а паротне кевень пандокс вачкавсть Филянь пряс, апак фатя листь сельведензэ, прок лисьма прясто ведь, кевердсть чамаванзо алов пандт. Пурдызе бокав прянзо, салава Катянь эйстэ нардынзе сельмензэ.

— Ламоксть уш сёвнынь заведующеенть марто тень коряс. Ськамот мезеяк а теят, арась активесь эщо, — мерсь Катя ды шаштсь Филя ёжос.

— Содазь аволь вадря. Мон ведь нейсынь, робочейтне кшинть сисем вайгельбеть кандыть котмерь лангсост, — таго кармась кортамо Катя.

— Актив совхозсонть ули, — пшкадсь Филя. — Монь ёно ламо алкуксонь робочейть, ансяк сави мартост роботамс.

Филя мендезе пильгензэ ды каизе вить кумажанть лангс. Мейле кувать мокшнасонзо лоштнесь пильгенть ланга.

20