„Kyadji makam njaot saka'into: „Saè, tanto sampèjan katekkan saddjhăna, sokkor sampèjan ongghoe atè, tor sabbhán taon kodhoe azijăra kaʼanto.”
„Laèn dări ka'into bhǎdhăn-kaoelă èberri'i djhimat băbătjan, èsoro amallaghi sabbhăn malem, polè mènnjan, èsoro obbhăr sabbhăn malem Djhoema'at sareng Salasa.”
„Kalagghoeănna bădjă ghoe-lagghoe bhădhăn-kaoelă pas azijăra ka bhoedjoe' karamat ghellǎ. Samarèna azijăra pas palèman è arè ka'into djhoeghăn.”
„Saamponna bhadhăn-kaoelă napa' ka bengko, pas arèken (èètong) abi'na pèssè abăk băḍăn, sabăb pèssè padjoena paḍi sè lèma pèkol ghellǎ' nèng karè kaempa' tengnga essèn, marghă sè lèma ropèja èbăghi ka kyadji asta. Kaʼinto ampon anjama sakone', sabab kè dhoekon mènta sapolo ropèja, mèlana ta' èberri' sakeng taḍă' polè.”
„Nangèng, sanapa'na ka bengko bhǎdhăn-kaoelǎ ètotorè bhălă binè', tja'èpon malemma kamalèngan paḍi kantos ghemmet.”
„Bhǎdhan-kaoelă è nalèka angghǎpanèka ampon ta' onèng sè matora mèkkèrè kasossa anna bhādhăn bắt-talèbắt.”
„Parandhinèng bhadhăn-kaoelă sè èntar ka bhoedjoe' karamat ghella' njarè sarat terro soghiă, anangèng ghoen-engghoenna orèng palang, sèla ta' soghi, la-mala kaèlangan radjhekkè sè ampon èkaollè, padă sareng tja'-otja'an: tjara mano' mègha' bălăng; sè èpèghǎ' ta' èkennèng, sè èperghem boeroe sakalè.”
„Amarghǎ angghăpanèka bhǎdhăn- kaoelă pas seḍḍhi, băbătjan ghella' ta' èlakoaghi, mènnjanna èboewăng kantos tjempat.”
„Samangkèn bhădhăn-kaoelă ngobă aloan, tjoma apangghăbăj èbhǎrentengngè, njarè radjhekkè sè halal ta' kalaban aghoeroe. Kadhǎddhiánna bhadhăn-kaoelǎ kèngèng bherkat sareng podjhina băbădjă[1] sè bănnja', samangkèn èparèngè pra-kappra sareng orèng, maskè ta' soghi, tateḍḍhă'ăn ta' posang.”
„Sarrèna bhădhăn-kaoelă ampon onèng tabhătjong, dhăddhi samangkèn ta' partjadjă polè ka parkara ka'into.”
„Ma'na Iswăd: „Ghănèko ghi' kantangnga. Djhǎ' sènga dhika terros partjadjă sarta èlakoaghi ongghoe bărămma masțèna, insja Alla dhika soghi ongghoe."
„Arsanè: „Mon bărinto bhender tja'na tja'-otja'anna orèng towa: ”Radjhekkè sè la ètjaḍhăngngaghi Ghoestè Alla ka tong-sèttongnga orèng, ta' kèra taporop ka radjhekkèna orèng laèn sè bănnè băgiănna. Boeld engghi bărinto kèja; ghi bilăn nalèka buela ghi' ngoḍăna, tjè' lèboerră aghaghoeroe parkara kasoghiăn. Dhinèng ghoeroe boelă neko orèng kotta, mèskèn, anjama ramana Djènal.”
- ↑ Băbădjă = băngatowa. S. S.
