Pachón y Pachín

by Félix de Aramburu

I
¿ Quién ye Pachón ?-Pachón ye
El gallu de tou 'l conceyu,
Pior qu' el pintón pa los mozos
Y pa les moces el mesmu.
Anque tien güeyos grandones,
Llistos, per guapos d' afechu,
Palu d' él, en sin mentir,
Llámenlu palu de ciegu;
Y anque duru com' un roble
Y com' un carbón de prietu,
Sos palabres á les neñes
Sábenios á miel y quesu.
Ente toes les rapaces
Del llugar, denguna el sesu
I regolvió como Pina,
La fia del molineru
Del molín que pol verano
Tien galbana y tase quietu
Y quiciás d' ivierno roda
Si cai agua un mes arreo.
Quier tanto á Pina Pachón,
Tanto Pina á Pachón quierlu,
Que non hay nuechi de Dios,
Trone, ñeve, aplane el xelu.
Desfáigase el cielo en agua
Ó semeye 'l mundu enteru
Boca de llobu en 'o 'escuro,
Que ciarre Pachón el güeyu
Sin dir á char la maquila
De lo que 'l alma tien dientro
Á isi molín que paez
Un bálagu n' un regueru.
Co la gadaña, en 'os bolos,
D' esfoyaza, d' amaguestu,
Lo mesmo en el trabayar
Qu' en reblincar de contentu,
Naide i pon el pié delantre
Á Pachón, que ye 'l primeru.
Pero cunten que Pachón
Al dir y al golver al ñeru
Onde tan la so palomba
Y el buchón de qu' á ser ser xenru,
Como de xuro ha pasar
Á la vera, pel llau mesmu
Del Campu-santu y la Iglesia,
Siempre i entra tal respetu
Al ver per un michinal,
Metanes el muru abíertu,
De la llámpara salir
El rellumu, qu' al gargüelu
Fai un ñudu, el cantu dexa,
Apreta el pasu y, llixeru
Non guelve á llanciar un gritu
Nin pa tras mira un momentu
Fasta que lloñe non queden
Los santos xunta los muertos.
-¿ Ye entós cobarde Pachón ?
Si lo diz dalgún sugetu,
Ye más que soltera vieya
Maldiciente y embusteru.

II
-¿ Quién ye Pachín ? ¿ Quién ye agora
Desque colaron diez meses
Dexandoi al probe mozu
La madre de les llaceries ?
Conocílu abondo, y mialma
Cúmpleme escurrilo arrede
Pa dicir qu' isti Pachín
Ye aquel Pachón d' otres veces.
Como grillos qu' al furacu
Espatuxando se güelven,
Los güeyos d' él afondiguen
Y pe los sesos sei meten;
De los papos de la cara
Non i quedaron nin señes;
Dóblasei el espinazu
Com' un arbolucu enxencle,
Y, per detrás, los calzones
Fáceni llórcies y plegues;
Les pates son estandorios
Y les manes garavetes;
Y ¡ mal añu p' al pecao !
Él que enjamás en 'es fiestes
Dexó de pintar, agora
Naide lu atopa per elles.
Espantadizu y corridu
Esmúzse com' una llebre
Por atayos, ente 'l rozu,
Fuxendo de les caleyes;
Y si aporta que dacuando
Pol amor del carro empriende
Derechu camín, entóncenes
Unta con sebo la exe,
Meti el obleru al ganao,
Qu' en sin esquiles va siempre,
Y ponse tras de la esquirpia
Pa que non lu vea la xente.
¡ Probe Pachín ! ¡ Qu' ablucau
Lu punxo Pina al amorrese !...
Pos sabeilo: ye el motivu
De to lo que i asocede
Qu' aquella Pina melguera,
La del molín que non muele,
En un calabre en sin vida
Dexola fecha una febre
Pa la que de na prestaron
Melecines nin promeses.
Magar que Pina morrió
( Dios l' haiga apañáol ) apenes
Hay vecln qu' á Pachin vea
Anqu' el velu xera i lleve.
Cunten qu' ente les vidayes
Diz él qu' un molín se i mete
Y que non ye com' el utru
Pos isti arreo dá güeltes;
Y cunten ( y isti ye el casu )
Qu' atapecío, muy sele,
Sal de casa en sin montera,
En sin palu nin madreñes.
Y cual si lu empovinás
Dalgún xudes d' algún duende,
Sin parar, pa 'l Campu-santu
Empriéndela á carrenderes,
Esguila por un carbayu
Pegau á les muries mismes,
Blinca, escluca á un llau y á utru,
Y, andando andando, escaezse
En un rincón onde pasa
Sin gorgutar hores muertes...
-¿ Tan valiente Pachín fizose
Que ya nin tembla nin cuerre
Co la fluz del michinal
Y ente defuntos se escuende ?
Ay Dios ! dexáilu y sabei
Que' el que anántes reciu viésteis
Y gayasperu, y agora
Véislu atristayáu y enxencle
Nin anántes fói cobarde
Nin agora ye valiente.