Pśi pśězy
| nadpis | Pśi pśězy |
|---|---|
| awtor | Mato Kósyk |
| lěto | |
| žrědło | http://texty.citanka.cz/pata/sc2-221.html |
| licenca | public domain |
| nota | stary pšawopis |
Gaž ja wjacor sama pilńe pśedu
A tak lubosny tam mjaseck glědnu
Tu pśez hokno na mńo słuchajcy,
Spiwam sebe ja 'ned chwatajcy:
"Luštńe hobertaj se kólasko,
Až mě niś z tog' lanu malsńej źo!"
Gaž ten wětš tam wence głušńe šarcy,
Mójo kólasko z nim teke barcy,
Ńepśestanu ja jo hobertaś,
Lěpej wóno mórcy, lěc co graś?
Luštńe hobertaj se kólasko,
Až mě niś z tog' lanu malsńej źo!
Coš mě skócyś, małsna nitka, z palca?
Ńecyń! howak buźoš wóte tkalca
Šćokana; 'coš pak mě ceła wóstaś,
Dejš že póšk za póškom wót mńo dostaś.
Luštńe hobertaj se kólasko,
Až mě niś z tog' lanu malsńej źo!
Ńocoš kólasko mě lasne byś,
Źož mě złobiš se a nocoš hyś,
Ga ja marskam si, ja twóje tšuny
Napinam, až klince ako zwóny.
Luštńe hobertaj se kólasko,
Až mě niś z tog' lanu malsńej źo!
Źinsa, niś, jan chwataj, až sy wša,
Witśe, witśe ga jo sobota,
Witśe ja śi njedu wěcej spiwkaś,
Pótom móžoš we tom rožku cywkaś.
Luštńe hob´ertaj se kółasko,
Až mě niś z tog' lanu malsńej źo!