Při kwasu

nadpis	Při kwasu
awtor	Jakub Bart-Ćišinski
lěto
žórło	luzice.euweb.cz
licenca	public domain
nota	stary prawopis

(Romanca.)

    Horka, deika, dom so kwasny swěći.
    K rejam zajuskaju hosćo zhrěći,

    Wonka ćma. Ze sněhom wětr je w kuli -
    K woknam pacholo so skradźu tuli.

    "Wohladać će jónkróć hišće jeno
    Chcu a zabyć potom twoje mjeno -"

    Njewjesta kaž róža rjana kćěje,
    Wóčko so kaž njebjo módre směje.

    Nawožeń ju k sebi tłóči cunje
    A ju wjerći nimo wokna runje ....

    Pachoł wonka zdyrknje kaž krew´ słaba
    Za hłowu so, za wutrobu hraba -

    Jemu być to hrozne zda so dźeće ....
    "Ně wšak ně!" A zuby křipja kleće.

    Wutroba so torha, čoło pali,
    A sněh pod nohomaj jemu smali.

    Preč wón wleče so do nocy ćmowej',
    Kaž by wutrobu njesł swoju k rowej.