Pükot as sam

(Se zülag Volapükakluba Hannover).

"Eko! Deli gudik, söl N.! Liko stadol e kis gevos obe stimi visita olik?"

"Danob plo säk gudlik, gudiküno! Labob begi. Egetob agödelo penedi se dän,^[1] äs jinos bonedami. Ab elenadob te nelijapüki e Flentapüki. Kimiko sevs oba pöfüdoms nu obi? Lovepololös penedi at?"

"Pidob vemüno. Liedö id ob no alos binob fägik, sevob ni Dänapüki ni nelijapüki ni Flentapüki-"

"No mögos! Luüno vo muton sevön pükis bofik lätikün!"

"Beno! - logol, kisi pöfüdoms in fal at. -"

"Dido lenosi, ed id in melakön ko läns bofik at obi te nemödikosi pöfüdoms, bi jünu no erivob sküli lefulik to stud möyelik."

"Ab kimiko ebitol, givön jäfe ola - pato in melak ko selän - veitami so gianik? Kimiko ibö melakol ko bonedels mödik ola in selän?"

"Baliko me Volapük."

"Begö, sagolös völadi kimik Volapük labom ibö - en lilon so ofen! Din lölik at binom ba stup?"

"O, no klödolös atosi! Leno! Logol len seks jäfik oba - nen Volapük irivoböv nevelo otis e komedob sikod dlaniko lenadön omi!"

"Si - ab binos pesagöl ba nefikulumo ka pedunöl - liko kanob ob man bäledik - nemögiko kanob jäfön studi nog yelislonedik."

"Dälo, i no zesüdos! Elenadob volapük^[2] in vigs 4, ye mödiks no nedoms so lonediko. Pos tim at binol lefulo fägik, spodön Volapüko."

"Stunob! Also - klödol velato -!"

"Si! si! - blüfolös ga - besäkolös mudiko u penädiko volapükaklubi isik, kokömom flidel alik vendelo in zilakadom ela Eilers len "Langenlaube," panunol us viliko dö valikos."

"Labol giti, olenlogob pöto dini at. Dani gudikün plo nüns flenik ola. Denulogö!"

"Begob, egivob omis gälo! Adyö."

NOETS (Vükifonät)

1. Bükapök; pla: Dän.
2. Bükapök; pla: Volapüki.

Se Kosmopolan 1891, Nüm: 1, Pad: 5.