Pòis Raimon e’N Trucs Malècs

From Wikisource
Jump to navigation Jump to search
Pòis Raimon e’N Trucs Malècs
by Arnaut Daniel

Pòis Raimon e’N Trucs Malècs
Chapten N’Aiman e sos dècs,
Enans serai vielhs e canècs
Ans que m’acòrt en aitals prècs
Dont puòsca venir tan grans pècs ;
Qu’al còrnar l’agra mestièrs bècs
Ab que’lh traissés del còrn los grècs ;
Que’l fums es fòrtz qu’ieis dins dels plècs.

Ben l’agr’ òps que fos becutz
E’l bècs fos longs et agutz
Que’l còrns es fèrs, laitz e pelutz
E nul jor non estai eissutz,
Et es priond dins la palutz
Per que relent’ ensús lo glutz
Qu’adès per si cor ne rendutz ;
E non vuòlh que mais sia drutz
Cel que sa boch’ al còrn condutz.

Pro i agra d’autres assais,
De plus bèls que valgron mais,
E si En Bernartz se’n estrais,
Per Crist, anc no’i fetz que savais,
Car le’n pres paors et esglais.
Car si’l vengués d’amont lo rais
Tot l’escaldèra’l còl e’l cais ;
E no’s convén que dòmna bais
Aquel qui cornès còrn putnais.

Bernartz, ges eu non m’acòrt
Al dich Raimon de Durfòrt
Que vos anc mais n’aguessetz tòrt ;
Que si cornavatz fort contràfòrt,
E la pudors agra’us tòst mòrt,
Que peitz òlh non fa fems en òrt ;
E vos, qui que’us en desconòrt,
Lausatz en Deu que’us n’a estòrt.

Ben es estòrtz de perilh
Que retrach fora son filh
E a totz aicels de Cornilh ;
Mielhs li fora fos en issilh
Que la cornès dins l’enfonilh
Entre l’eschin’ e’l penchenilh
Lai ont se sagna de rovilh ;
Ja non saubrà tant de gandilh
No’l compissès lo gronh e’l cilh.

Dòmna, ges Bernartz non s’estrilh
Del corn cornar sens gran dosilh
Ab que sèire’l trauc del penilh,
Puòis poirà cornar sens perilh.


This work was published before January 1, 1929, and is in the public domain worldwide because the author died at least 100 years ago.