Oy qo‘ynida
Shaftoli kelinchak,
Uning qo‘ynida men tentak…
«Men bog‘ingga kirmasdan,
Adoq bo‘pti yemasdan.
Muncha to‘lib yig‘laysan
Men qo‘yningga kirmasdan…»
(Xalq qo‘shig‘i)
Bir tomchi to‘kilgan yosh uchun shuncha so‘lishmi?
Bu bog‘chada gul ko‘p edi – so‘ldi amalimdek!
Ko‘nglingda biror sharpani sezsam edi, guldek
O‘lganda-da sen menda ko‘rarding sevinishni!
Shaftolida oy nurini ko‘rgach yana ruhim,
Oylar kabi yosh davriga suqlar kabi boqdi.
Yoshlik o‘zi – sevging kabi – tortilmadi bir zum,
Bir zum o‘zi, bir gul o‘zi… do‘zax kabi yoqdi!
Ko‘p titrama, ko‘p o‘ynama, ko‘p qaynama, ey barg!
Hirs ko‘zlari sof ko‘ksingga og‘uli tikandek
Bir botsa-da, yig‘latsa-da, dodlatsa-da… mendek
Har ko‘zga boqarsangki: «Topilmas toza istak!»
Mendan so‘ra: yolg‘iz, mana, men aldanib o‘tdim,
Har safhasi, har yaprog‘i «aldash» bu kitobning!
Bir o‘qqa ilinmasmi, tilinmasmidi joning?
Oy qo‘ynida tong otguncha senga shuni aytdim…
Bir tomchi to‘kilgan yosh uchun shuncha so‘libsan,
Aldamchi fano ko‘zlara tentakcha kulibsan!..
Toshkent. 1923, 3-iyun
|
This work is first published in Uzbekistan and is now in the public domain because its copyright protection has expired by virtue of the Law of the Republic of Uzbekistan on Copyright and Related Rights, enacted 2006, amended 2021. The work meets one of the following criteria:
|
|