Orland Furius
Lodovigh Ferraris (XVI sec.)
Orland Furius
ORLAND FURIUS
de Misser Lodovic Ferraris
novament compost in
buna lingua da Berghem
e de oter vocabui Lombardi adornat.
Opera da piasì, e da sgrignà
profumadament indrizat
dal Gobo da Venezia
a M. Pasquì
E canti de le putte, e de barù
l'armi, l'amur el bel furegamet
che fu nel tep che passì i Mor poltrù
de zà dal mar in Franza al strugimet
guidag dal re Agramang zoven menchiù
qual ha zurad, e fatto sagramet,
de vendicà so pader re Troià
ados a Carlo che la fo chigà.
Dirò d'Urland pò tut in d'una bota
cosa nomai sentida in fe de Dé
come deventì pez che una recota
e mat spazat dal co per fina ai pe
che fu savi zentil gne una carota
come i oter savia cazà de dré
ma preghi Venturina aiut em daghì
che senza quel em chigarò en le braghì.
Es preghi vu che sé de la semenza
d'Ercul antic, e pò lusì chilò
intotom orbis, da Berghem a Fiorenza
e pò de zà e pò de là da pò
dem del savor cola vostra presenza
tragent l'oregie ben fora del co
ses doni poche ti no storzi el mus
tutto so vostro dai cavei in fus.
Vu sentirì fra zent incoronada
che voi chilò naraf a grand unur
menzonar quel Rugier, e la brigada
donde si insit o car el me signur
avoi bisavoi tutta la masnada
perzò ev preghi ch'em donè sentur,
savi penser d'amur o dul mangià
es preghi mettil zo e stem scoltà.
[...]