Ona mosca in sul Domm
Giovanni Chiverny (1812-1900)
Ona mosca in sul Domm
Gh'era fermo on paisan denanz del Domm
col fà de vun ch'è intent a remirall
e duu, avvisinand sto galantomm,
cont on poo de intenzion de mincionall,
guardand in su ghe disen: "In alt, là,
nun vedom ona mosca a camminà!"
Ma el picch, cont ona sbergna de forlina,
(l'era forsi brianzœu) fissaa el cornis
de la facciada e missa la manzina
all'oreggia, tutt seri mò el ghe dis:
"O sciori, de sicur l'è proppi là!
Citto lì,... che la senti a pedonà!"